„Allir sem unnið hafa með sjálfsvíg og sjálfsvígstilraunir vita hversu stórt hlutverk eineltið leikur í þunglyndi þeirra sem reyna að svipta sig lífi […] Á síðustu tímum hefur merking orðins verið að breytast. Venjulegar deilur manna á milli á vinnustað eða í skóla eru kallaðar einelti.“ Þetta skrifar Óttar Guðmundsson læknir í grein á Stundinni. Segir hann orðið einelti hafa verið gjaldfellt og vísar til deilna Bubba Morthens og Þórunnar Antoníu. Líkt og greint var frá fyrr í mánuðinum sakaði Þórunn Bubba um að leggja sig í einelti þegar þau voru dómarar í sjónvarpsþættinum Island Got Talent. Krafðist hún afsökunarbeiðni frá Bubba. Þegar hún kom, þótti Þórunni ekki mikið til þeirrar afsökunarbeiðni koma.

Óttar fjallar um málið og hugtakið einelti og segir:

„Ung og glæsileg söngkona (Þórunn Antonía) sakar þekktan söngvara (Bubba) um að leggja sig í einelti á vinnustað þeirra beggja, sjónvarpinu. Sakirnar eru kjánalegar athugasemdir í hita leiksins og súkkulaðimolakast. Skemmtikraftarnir hafa fengið mikla athygli út á þessar ásakanir. Hann hefur margbeðist afsökunar sem hún vill ekki taka mark á. Spurningin er hvort hún sé farin að leggja söngvarann í einelti með því að saka hann ítrekað um einelti.“

Óttar segir að um misnotkun sé að ræða á eineltishugtakinu og þarna hafi verið um að ræða árekstra vinnufélaga í streitu fjölmiðlaheimsins.

„Mannleg samskipti einkennast alltaf af einhverjum núningi, stríðni og kerskni og aulafyndni. Enginn er svo heilagur og lúsarlaus að hann sé ekki stundum klaufalegur í samskiptum sínum við aðra. En það er sjaldnast einelti. Mér finnst vafasamt að söngkonan unga taki svo mikið mark á söngvaranum að hún láti þessi orð hans og súkkulaðikast draga úr sér allan kraft, svipta sig sjálfstrausti og eyðileggja fyrir sér lit dagana eins og gerist í raunverulegu einelti.“

Segir Óttar að lokum að eilífar ásakir um einelti séu hluti af fórnarlambsvæðingu samtímans.

„Er það bara ekki allt í lagi? Nei, vegna þess að það er yfirgengileg lítilsvirðing við raunveruleg fórnarlömb eineltis sem eiga rétt á að orðið fái að halda gildi sínu en sé ekki gert að lúxusleikfangi í orðaleikjum og auglýsingamennsku í píslarvættisvæðingu samtímans.“