Arnar Már Vilhjálmsson var staddur á flugvellinum í Dubai í Sameinuðu arabísku furstadæmunum að lesa bók eftir rithöfundinn vinsæla, Camillu Läckberg þegar sagt var:
„Gaman að sjá að þú nýtur bókarinnar.“
Arnar leit upp og sá þá að þarna var sænski höfundinn sjálfur kominn. Arnar lýsir þessari reynslu í samtali við RÚV en Camilla birtir einnig mynd af Arnari á Instagram-síðu sinni. Camilla er afar vinsæl á samskiptamiðlinum en um 160 þúsund manns eru aðdáendur hennar þar.
Camilla skrifar á Instagram að hún hafi það fyrir sið þegar hún rekst á fólk lesa bækur hennar að kasta á það kveðju. Arnar sendi Camillu skeyti undir myndinni og segir í lauslegri þýðingu:
„Það var afar gleðilegt að hitta þig svona óvænt Camilla. Þessu átti ég ekki von á, enda býst maður vanalega ekki við því að hitta höfund bókarinnar sem maður er að lesa í það skiptið. Ég bað ekki ekki einu sinni um eiginhandaráritun en mér til varnar, þá var ég illa sofinn. Þegar ég síðan segi vinum mínum frá þessu atviki, legg ég áherslu á að það varst þú sem nálgaðist mig og baðst um að fá að taka mynd :). Ég óska þér góðs gengis með næstu verk og hlakka til að lesa þær.“
Camilla óskaði svo eftir leyfi til að birta myndina á Instagram-síðu sinni þar sem hún hefur slegið í gegn.
