Tónlistarmaðurinn David Bowie sem lést fyrr í mánuðinum, tæplega sjötugur að aldri, er talinn hafa átt eignir upp á um þrettán milljarða íslenskra króna. Erfðaskrá hans var gerð opinber í morgun.

Þar kemur ýmislegt athyglisvert fram en meðal þess sem helst vekur athygli er hversu rausnarlegur Bowie var við þá sem stóðu honum næst. Þannig erfiðar aðstoðarmaður hans tvær milljónir dala, jafnvirði 260 milljóna íslenskra króna, og barnfóstra sonar hans, Duncans, erfir eina milljón dala, jafnvirði 130 milljóna íslenskra króna.

Restinni verður skipt á milli fjölskyldumeðlima Bowie, þar á meðal glæsileg íbúð hans á Manhattan í New York.

Newsweek greindi frá því í vikunni að Bowie hafi skilið eftir sig stórt safn af tónlist sem aldrei hefur verið gefin út. Er talið að tónlistin verði gefin út á næstu mánuðum eða árum, þar á meðal tónlist sem hann samdi á hátindi ferils síns á áttunda og níunda áratug liðinnar aldar.