Katrín Oddsdóttir mannréttindalögfræðingur gagnrýnir umfjöllun RÚV um uppreista æru Atla Helgasonar og segir hana einkennast af hefndarþorsta. Líkt og DV greindi frá í gær er Atli nú með óflekkað mannorð í skilningi laganna og hyggst hann fá málflutningsréttindi sín á ný. Hann var dæmdur fyrir að hafa orðið Einar Erni Birgissyni að bana í nóvember árið 2000.

Kastljós greindi frá því í gærkvöldi að Atla hefði verið veitt uppreist æru af innanríkisráðuneytinu. Miklar umræður hafa skapast um málið undanfarin sólarhring og fjölmargir einstaklingar tjáð skoðun sína á máli Atla á samfélagsmiðlum.

Birgir Örn Birgisson, faðir Einars Ernis er einn af þeim sem hafa tjáð skoðun sína en hann var í viðtali við Fréttablaðið þar sem hann sagði að fréttirnar hefðu verið eins og „blaut tuska í andlitið“: „Hann hefur aldrei sýnt nokkra iðrun til okkar í þessu sambandi. Við höfum aldrei heyrt í honum. Mér finnst það bara vera í beinu framhaldi af því hversu útsmoginn hann var á meðan þetta var að ganga yfir.“

Katrín tjáir sig um málið í færslu á facebooksíðu sinni og gagnrýnir þar umfjöllun Kastljóss: „Mér finnst helst til of mikill hefndarþorsti grundvalla þennan mikla fréttaflutning RÚV af máli Atla Helgasonar,“ ritar hún.

Hún segir umfjöllunin ýta undir hefndarþorsta: „Fyrsta frétt og Kastljósumfjöllun um það að maður, sem hefur setið af sér sinn dóm, geri tilraun til að fá lögmannsréttindi. Er það til annars en að kalla eftir viðbrögðum sem byggjast á hatri og gremju?“

Þá hvetur hún fólk til að sýna nærgætni í umræðunni. „Þrátt fyrir að þarna hafi verið framinn óhugnalegur glæpur verður einhvern tímann að linna og leyfa fólki sem lifir að halda áfram, næg hlýtur byrðin að vera af því að hafa framið slíkan glæp.“