„Ég sit hér í dýrðinni í Flatey á Breiðafirði ásamt elskunni minni og ungum og get varla orða bundist yfir öllum fallegu kveðjunum senn enn eru að berast.“
Þetta segir Jökull Bergmann, einn reyndasti fjallaleiðsögumaður landsins og eigandi Arctic Heli Skiing á Facebook. Jökull sem fagnaði fertugsafmælinu sínu í gær afþakkaði allar gjafir en bað fólk þess í stað að styrkja björgunarsveitina í heimabæ hans, Dalvík, sem hefur komið honum og fleirum til bjargar í gegnum árin.
Dv greindi frá því í lok júlí að Jökull sjálfur ætlaði að gefa milljón og vonaðist til að þær yrðu tvær með aðstoð vina og almennings. „Þarna vil ég koma mínu fólki til aðstoðar eins og þau hafa aðstoðað mig í hvert einasta skipti sem ég hef þurft á þeim að halda,“ sagði Jökull um ástæðu þess að hann vildi leggja björgunarsveitinni lið.
Það var svo í morgun að sem Jökull greindi frá því að hann hafi fengið 956 þúsund krónur í afmælisgjöf og lagði því tvær milljónir inn á Björgunarsveitina í Dalvík.
„Ekki nóg með að Fésið hafi logað af hamingjuóskum yfir því að ná þessum fjórða tugi heldur fékk ég heila miljón króna í afmælisgjöf frá ykkur (955.721.- ISK) Þar með er áskorun minni til ykkar lokið. Þetta er fertugsafmælisgjöfin mín og ykkar til vina minna í Björgunarsveitin Dalvík.“
Jökull vill með gjöfinni benda á hversu mikilvæg björgunarsveitin er samfélaginu. Öll starfsemi er unnin í sjálfboðavinnu og fjármögnun erfið.
