„Þessi lífsreynsla hefur gefið mér ákveðinn skilning og dýpt sem manneskja og listamaður,“segir leikkonan ástsæla Helga Braga Jónsdóttir sem um áraraðir hefur skemmt landanum á sviði, í kvikmyndum og í sjónvarpi. Er þar skemmst að minnast hinna goðsagnakenndu Fóstbræðraþátta þar sem Helga Braga skapaði margar af eftirminnilegustu persónum íslenskrar sjónvarpssögu en hin geðþekka gamanleikkona segir ómetanlegt að geta gert grín að sjálfri sér, enda þyki henni vænt um gallana sína. Hún lagðist í mikla sjálfsvinnu fyrir þrítugt og hefur gert upp fortíðina, þar á meðal ofbeldissamband og kynferðisofbeldi.

Helga Braga er í ítarlegu og einlægu viðtali við tímaritið MAN þar sem hún kemur meðal annars inn á andlegt hugleiðsluprógramm sem hún hefur stundað frá árinu 1997, en í því felst að borða ekki dýr og neyta ekki áfengis eða annarra fíkniefna. Hún kveðst hafa notað vín til að ná sér niður eftir gigg en hún hafi þó náð að stoppa áður en neyslan varð vandamál. Mögulega hefði hún annars þróast út í fínan „gardínualka“ eins og hún orðar það en aðrir hlutir veita henni lífsfyllingu í dag.

Hún kveðst tileinka sér hugsunarhátt 12 spora kerfisins þó svo að hún hafi ekki farið í meðferð. „Ef það er eitthvað sem gerðist ekki þá hef ég sætt mig við það. Ef það er eitthvað sem ég þarf að gera upp eða biðjast afsökunar á þá er það gert,“ segir hún og nefnir sem dæmi hvernig hún hefur notast við þetta viðhorf til að gera upp fortíðina.

„Ég var í fimm ára löngu ofbeldissambandi á mínum yngri árum og lenti auk þess í kynferðisofbeldi sem barn. Þetta tvennt er að miklu leyti ástæðan fyrir því að ég fór í mikla sjálfsvinnu innan við þrítugt, því ég var brotin stúlka með lágt sjálfsmat,“

segir hin geðþekka gamanleikkona og bætir við að hún sé í raun þakklát fyrir þessa reynslu því með henni hafi hún öðlast skilning sem meðal annars hafi gert henni kleift að halda fyrirlestra og námskeið um sjálfsstyrkingu.

Viðtalið við Helgu Brögu má nálgast í heild sinni í nýjasta tölublaði MAN.