Rósa Ingólfsdóttir er ánægð með þau viðbrögð sem pistill hennar, „Vilja konur líta út eins og tuddar?“, hefur vakið. Þar sagði Rósa meðal annars að konur yrðu að gæta sín á að slíta sér ekki út í tilgangslausri líkamsrækt sem miði einungis að því að byggja upp karlmannlega og samanrekna vöðva. Rósa svarar fyrir pistilinn á Pressunni.

Sjá nánar:Óskiljanlegt að konur vilji lyfta þungum lóðum

Í pistlinum sagði Rósa meðal annars:

„Hverju sem fólk reynir svo að breyta með þessu þá er ekki hægt að vinna svona á móti náttúrunni; konur mega gæta sín á því að slíta sér ekki út í tilgangslausri líkamsrækt sem miðar að því einu að byggja upp karlmannlega og samanrekna vöðva. Styrkur konunnar er fólginn í mýktinni. Konan er sífellt að spegúlera í því hvort hún sé nógu falleg fyrir karlmanninn og finnst hún jafnvel of feit. Kvenleg fegurð er eftirsóknarverð en sannleikurinn er sá að allar konur geta verið fallegar ef þær bara slaka á og líta í gaupnir sér.“

Lausnin að mati Rósu er þessi: „Í heimalöguðum máltíðum sem eldaðar eru frá grunni, er öll bætiefni að finna og samhliða því sem konur ættu að æfa eftir kvenlegu æfingakerfi megum við ekki vaða svo langt í æfingunum að við förum að rymja í salnum og reka stórkarlalega við.“

Rósa segir í samtali við Pressuna að ánægjulegt sé að geta hrist upp í þjóðfélaginu. Það sé gott að fá umræðu. Beðin um að útskýra nánar þau ummæli að líkamsrækt kvenna sé komin út í öfgar og margar konur líti út eins og þrútnir karlmenn eftir átökin í ræktinni og hvar hún hafi séð þær konur, svarar Rósa:

„Ég er með augun opin og fylgist með hvað er að gerast, fylgist með konum hingað og þangað. Ég er búin að sjá ýmislegt og ferðast um.“

Blm: „Þú nefnir að þú hafir ósjaldan komið að grátandi konu úti í horni því maðurinn hennar sagði að hún væri ekki nógu kvenleg. Getur þú útskýrt þetta nánar?“

„Þetta er mjög algengt að þetta komi fyrir. Ég er að tala um konur sem eru til dæmis alltof feitar. Það er algengt að konur séu of feitar og ein vigti eins og tvær. Sumir kalla þetta umhverfismengun. Ég vil meina að þetta sé tilkomið út af skyndibitamatnum og hreyfingarleysi. En það er alltaf hægt að laga þetta. Íslensku konurnar eru með þeim fegurstu konum í heimi. Þess vegna er svo gaman að koma með svona grein til að opna umræðuna,“ svarar Rósa.

Blm: „Þessar konur sem vaða fram með þanda nasavængi, útskeifar og með bassarödd. Hvaða konur eru það? Ertu að tala um einhverjar ákveðnar sem hafa orðið á vegi þínum?“

„Það er mikið um þessar konur. Það er hægt að hjálpa öllum. Það er bara spurning hvað hentar hverjum og einum. Fólk sem er yfir sig feitt er með feita rödd sem lýsir þessari bassarödd sem um ræðir. Röddin á fólki breytist oft þegar það verður of feitt.“

Rósa bætir við að hún hafi fyrst og fremst viljað skap umræðu. Hér má lesa pistil hennar í heild sinni.