Hlustaðu á þáttinn á Spotify og öllum helstu hlaðvarpsveitum. Textabrot úr þættinum má lesa hér að neðan.
Það var nóg að gera hjá Kristínu Þóru síðastliðið ár. Auk þess að vera með vel heppnaða og eftirsótta sýningu í Þjóðleikhúsinu, Á rauðu ljósi, þá leikur hún í tveimur nýjum þáttum. Dönsku konunni á RÚV og Heimaey í Sjónvarpi Símans.
Fyrsti þáttur af Dönsku konunni var sýndur á nýársdag á meðan Heimaey fór í loftið í lok nóvember í fyrra.
„Danska konan er í leikstjórn Benedikts Erlingssonar og Trine Dyrholm leikur aðalhlutverkið. Þetta er um danska konu sem flytur í blokk vill að allir tali dönsku og tekur málið svolítið í sínar hendur. Ótrúlega frumlegt og ferskt,“ segir Kristín Þóra.
Heimaey er íslensk/portúgölsk þáttaröð um morðrannsókn í Vestmannaeyjum.
„Bæði verkefnin í eðli sínu og karakterarnir mínir eru mjög ólíkir,“ segir Kristín.
Aðspurð hvort hlutverkinu hún fíli sig betur í segr hún: „Ég bara get ekki valið á milli, bæði bara jafn skemmtilegt.“
Kristín Þóra lék einnig í Áramótaskaupinu í fyrra og var í námi í jákvæðri sálfræði. Hún segist geta farið í gegnum svona annasöm tímabil þökk sér eiginmanninum og börnunum. Hún segir líka hjálpa að vita að þetta sé bara tímabil og að rólegri stundir séu fram undan, eins og núna eftir áramót.
„Ég á náttúrulega stórkostlegan maka og ótrúlega flott og dugleg börn. Og frábært bakland, bæði foreldrar mínir og tengdaforeldrar eru ótrúleg. En ég geri eiginlega ekkert annað en að vera mamma og vinna þegar það er svona törn,“ segir hún og bætir við að forgangsröðun skipti miklu máli og að minnka kröfurnar til sín.
Hún ræðir nánar um þættina, verkefnin og leikaralífið í Fókus, sem má hlusta á í heild sinni hér. Hún opnar sig einnig um kulnun og ástina.
Kristín er enn að sýna Á rauðu ljósi í Þjóðleikhúsinu þar sem hún talar til áhorfenda á bráðfyndinn hátt, en af einlægni og hispursleysi, um stress, streitu, seiglu, aumingjaskap og dugnað.
