Raftónlistartvíeykið ClubDub hefur liðast í sundur, en annar helmingur þess, Aron Kristinn Jónasson, greinir frá því á Instagram að hann sé hættur í hljómsveitinni.
„Ég er hættur í ClubDub. Ást og friður,“ skrifaði hann á Instagram í dag, en Vísir greindi fyrst frá færslunni.
Hinn helmingur ClubDub er Brynjar Barkarson, en hann hefur verið umdeildur undanfarið vegna þátttöku í umræðunni um útlendingamálin. Hann varð af verkefnum eftir að hann kallaði múslima blóðsugur og um helgina flutti hann ræðu á mótmælafundi á Austurvelli þar sem hann kallaði íslam ógn við lýðræðið og varaði við því að kommúnískir glóbalistar ætluðu sér að taka völdin á Íslandi.
