„Í rúm þrjú ár hef ég átt eltihrelli. David.“
Á þessum orðum hefst Facebook-færsla rithöfundarins og baráttukonunnar Þórdísar Elvu Þorvaldsdóttur þar sem hún greinir frá glímu sinni við erlendan eltihrelli, sem nefnir sig David Young, á samfélagsmiðlinum. Þórdís Elva birtir fjölmörg skilaboð sem henni barst frá ofbeldismanninum þar til að Facebook greip loks til aðgerða í gær eftir fjölmargar tilkynningar.
„Ég kalla fram stórar tilfinningar í David. Í hans huga braut ég allar reglur þegar ég neitaði að bera sökina og skömmina fyrir að hafa verið nauðgað af fyrstu ástinni minni. David var ekki hrifinn af þessu,“ skrifar Þórdís Elva.
Það vakti mikla athygli þegar Þórdís Elva steig fram á TED-fyrirlestri ásamt æskuástinni sinni, Tom Stranger, sem endaði með því að nauðga henni eftir skólaball. Tæpum áratug síðar skrifaði Þórdís Elva bréf til Toms sem gekkst við gjörðum sínum og gerðu þau það síðan upp í bæði ræðu og riti. Síðan hefur Þórdís Elva verið áberandi í baráttunni gegn kynbundnu ofbeldi sem hefur gert hana að skotmarki.
„Menn eins og David vinna heimavinnuna sína. Þeir kaupa bókina mína og horfa á TED talkið mitt og snúa orðum mínum upp í pílur sem þeir kasta aftur að mér. Sumir þeirra senda mér endurskrif sín á nauðgun minni, þar sem þeir eru í hlutverki geranda míns. Þeir ylja sér við þá hugmynd um að láta mig endurupplifa áföll mín og neyða upp á mig skömm, vona að ég kafni og hörfi aftur inn í þögnina sem hylmir yfir ofbeldi þeirra,“ skrifar Þórdís Elva en hún telur ástæðuna blasa við.
„Raunveruleikinn er sá að menn eins og Davíð eru skíthræddir við mig. Eina leiðin sem þeir þekkja til að öðlast völd er með valdi, og eina leiðin til að viðhalda þeim er í gegnum ofbeldi. Kona sem neitar að brotna, jafnvel eftir nauðgun, ógnar því kerfi. Þess vegna kalla þeir mig hættulega og öfgafulla,“ skrifar Þórdís Elva og segir að æði renni á slíka menn sem reyni allt til að deyfa ljós hennar.
„Áður en Facebook greip loksins til aðgerða gegn Davíð í dag var það síðasta sem hann spurði mig: „Af hverju þarftu svona mikla ást? “ Og það er virkilega kjarninn hér. Fyrir menn eins og hann, er dirfska mín óskiljanleg, að þrátt fyrir misnotkun þeirra, þori ég að elska sjálfan mig nóg til að þegja ekki. Þeir eru ringlaðir vegna þess að ég neita að kenna sjálfri mér um ofbeldið. Að ég sé tilbúinn að hrópa frá húsþökum að þeir einu sem beri ábyrgð séu þeir sem beiti ofbeldinu og að við þurfum að brenna þetta ofbeldisfulla kvenhatur til grunna. Þetta verður í eina skiptið sem ég mun nokkurn tíma virða spurningar þínar með svari, David, svo fylgstu vel með: „Í heimi fullum af hatri eins og þínu, er ást eins og mín uppreisn. Farðu nú til andskotans alla leið aftur undir steininn þar sem þú komst,“ skrifar Þórdís Elva.
