Kolbrún Ósk Skaftadóttir er bókalagerstjóri hjá nokkrum vönduðum bókaútgáfum landsins.

Kolbrún byrjaði ung í bókabransanum, vann í Pennanum/Eymunds.son, bókabúð Forlagsins á Granda, sem vörustjóri bóka og fleira hjá Heimkaup og hjá Storytel. Kolbrún Ósk var öflug í íþróttum hjá KR á yngri árum þar sem hún keppti í fótbolta, handbolta og körfubolta. Í áratug vann hún einnig sem plötusnúður.

Hún skrifaði fyrir marga netmiðla um bækur og skrifaði bókagagnrýni í mörg ár. Það gerir hún enn í dag á eigin samfélagsmiðlum og sýnir bækur sem hún hefur lesið og vill mæla með.

Kolla býr með rit- og myndhöfundinum Bergrúni Írísi Sævarsdóttur, frá fyrri samböndum eiga þær tvo syni hvor og er öll fjölskyldan unnendur bóka og lesa mikið.

Kolla er lesandi DV.

Hvaða bók/bækur ertu að lesa núna?

• Allar litlu lygarnar eftir Evu Björg er ég að lesa með konunni minni. Við erum alltaf með eina bók í gangi sem við skiptumst á að lesa fyrir hvor aðra.
• Silfurgengið eftir Brynhildi Þórarinsdóttur
• Akam, ég og Annika eftir Þórunni Rakel Gylfadóttur

Hvaða bók/bækur laukstu við síðast og hvernig fannst þér hún/þær?

Síðustu þrjár bækur sem ég las voru þessar:

• Lygileg jól eftir Söruh Morgan. Þessi bók er algjör ljúflestrardásemd og ekki skemmir að hún er jólabók þar sem ég er mjög mikið jólabarn.
• Sólgos eftir Arndísi Þórarins fannst mér alveg geggjuð.
• Ísbirnir eftir Sólveigu Páls. Pottþéttur krimmi. Sólveig er þannig höfundur að mér finnst ég geta gengið að því vísu að bókin sé góð. Þessi bók staðfestir það.
• Skólinn í Skrímslabæ eftir Bergrúnu Írisi og Tind Lilju. Ég er auðvitað alls ekki hlutlaus þarna, þar sem hún er konan mín, en bókin er engu að síður besta barnabókin í ár að mínu mati. Skemmtileg, fyndin og spennandi saga með dásamlegum teikningum.

Hefurðu nýlega gefist upp á að lesa einhverja bók eða hefurðu lesið einhverja bók nýlega sem stóðst ekki væntingar?

Já, ég gefst mjög reglulega upp á bókum og hætti að lesa.  Ef bókin nær mér ekki á fyrstu síðunum þá legg ég hana einfaldlega frá mér og byrja á næstu. Eina bók úr þessu jólabókaflóði hélt ég reyndar áfram með og kláraði, þó ég hafi ekki verið sérstaklega spennt fyrir henni, en það var nú bara af því að hún var nógu stutt til að ég nennti því. Ég mun samt ekki lista upp neinar bækur sem héldu mér ekki eða mér fannst ekki góðar. Svoleiðis er auðvitað alltaf smekksatriði og ég reyni að halda mig við þá reglu að tala jákvætt um þær bækur sem ég get mælt með en láta annað ósagt.

Hvar finnst þér best að lesa og er einhver tími dags betri en annar?

Best finnst mér að lesa á Hellissandi og fer þangað í lestrarferð með góðri vinkonu 1-2 á ári. Þá gerum við ekkert annað en að lesa og borða skinku- og ostsamlokur heila helgi.

Ég held að það sé hins vegar enginn tími dags endilega betri en annar. Er ekki alltaf góður tími til að lesa?

Manstu eftir hvaða bók var lesin fyrst fyrir þig sem barn og/eða sem þú last sjálf/ur sem barn? 

Nei, ég man lítið eftir lestri sem barn en ég man þegar ég las unglingabækur Þorgríms Þráinssonar. Ég byrjaði ekki almennilega að lesa fyrr en á unglingsaldri en hef ekki hætt síðan. Las þá í fyrsta sinn bók eftir Vigdísi Grímsdóttur og  hef alltaf sagt að hún hafi í raun búið til þann lestrarhest sem ég er í dag.

Er einhver bók/bækur sem þú getur ekki beðið eftir að lesa?

Já! Á þessum árstíma eru ótrúlega margar bækur sem ég er spennt að lesa. Þar sem ég vinn sjálf í þessum bransa getur samt oft verið erfitt að komast yfir allt sem mig langar að lesa því það er svo ofboðslega mikið að gera í vinnunni.

Áttu þér uppáhaldsbók/bækur sem þú jafnvel lest aftur og aftur?

Yfirleitt les ég ekki bækur aftur eða oft, nei. Uppáhalds íslenska bókin mín er þó klárlega Ljósa eftir Kristínu Steinsdóttur og bókin Sjö eiginmenn Evelyn Hugo eftir Taylor Jenkins Reid er líka í miklu uppáhaldi.

Áttu þér uppáhalds höfund/a?

Úff já! Svo ótalmarga. Ef ég ætti að nefna einhverja, væru það til dæmis Sólveig Páls, Eva Björg, Arndís Þórarins, Taylor Jenkins Reid, Ragnheiður Gests og Steindór Ívarsson en þessi listi er alls ekki tæmandi.

Annars finnst mér fátt skemmtilegra en að lesa vandaðar barna- og unglingabækur.

Hvaða bók/bækur hafa haft mest áhrif á þig og hvers vegna?

Ég elska að lesa bækur sem kalla fram tilfinningar, hvort heldur sem er tár eða gleði. Fjöldi bóka snerta mig líka djúpt án þess að ég geti sagt nákvæmlega hvers vegna. Ég held samt að sú bók sem hafi haft hvað mest áhrif á mig hafi verið Ég heiti Ísbjörg, ég er ljón eftir Vigdísi Gríms. Það er sú bók sem ég las á unglingsárunum, með alla hormóna í blússandi gangi og ég grét og sökk alveg ofan í bókina. Ég held ég hafi eftir þann lestur áttað mig á að ég yrði að lesa miklu meira og sjá fyrir mér og upplifa sögur fólksins í bókunum. Ég er þessvegna svo ótrúlega þakklát fyrir þá höfunda sem gera okkur lesþyrsta fólkinu það kleift.

Hvaða bók/bækur ættu allir að lesa (bók/bækur sem þú mælir alltaf með)?

Þetta er erfið spurning því alveg sama hversu mikið ég mæli með einhverri bók, þá er smekkur fólks alltaf svo misjafn og ég þori að fullyrða að engin bók er þannig að öllum líki hún. Þær bækur sem ég hef hvað mest mælt með í gegnum árin eru þó líklega Sjö eiginmenn Evelyn Hugo, eftir Taylor Jenkins Reid, Karítas án titils, eftir Kristínu Marju Baldursdóttur og Sálarhlekkir eftir Steindór Ívarsson.