Þórdís Björk Þorfinnsdóttir hefur getið sér gott orð sem söng- og leikkona í gegnum árin og hefur hún starfað við talsetningu um árabil. Margir þekkja rödd hennar úr vinsælu Disney-myndinni Frozen, en þar ljáði hún prinsessunni Önnu rödd sína.

Þórdís segir að þegar hún sótti um hlutverkið hafði hún ekki hugmynd um hversu stórt þetta yrði, en Frozen og Frozen II eru tvær af vinsælustu barnamyndum Disney.

Hún ræðir nánar um þetta í spilaranum hér að neðan. Brotið er hluti af nýjasta þætti af Fókus sem má horfa á hér í heild sinni, eða hlustaðu á Spotify.

„Það er yfirleitt þannig með svona stórar myndir, eins og frá Disney og Dreamworks, að þá eru alltaf prufur og þær eru sendar út og það eru erlendir aðilar sem að samþykkja hvort þú fáir hlutverkið eða ekki. Og Frozen, ég man ekki hvaða ár þetta er, þetta er svo langt síðan,“ segir hún.

Frozen kom út árið 2013. „Ég var ekkert búin að talsetja af viti þegar ég fékk þetta hlutverk. Þetta var eiginlega smá óvart að ég fór í prufu.“

Félagi Þórdísar stakk upp á því að hún myndi sækja um. „Ég vissi ekki neitt, ég vissi ekkert hvaða mynd þetta var eða hversu stór hún væri eða neitt.“

Nokkrum vikum seinna fékk Þórdís skilaboð að hún hafi fengið hlutverkið og stökk hún beint í djúpu laugina.

„Ég hafði ekki hugmynd um að þetta yrði svona stór mynd,“ segir hún.

Hún ræðir þetta nánar í spilaranum hér að ofan.

Sjá einnig: Þórdís Björk einlæg um móðurhlutverkið: „Það ætlar enginn að eiga fyrsta barnið sitt og vera einn eða upplifa sig einan“

Fylgdu Þórdísi á Instagram og TikTok.