Olga er rússnesk og Jesus er spænskur og þau eru stödd á landinu um smá skeið til að húðflúra. Í þættinum sagði Olga frá eftirminnilegum viðskiptavini sem leið tvisvar yfir í stólnum.
„Ég held að það hvíli á mér bölvun. Það líður stundum yfir viðskiptavini hjá mér,“ sagði hún.
„Einu sinni var ég með þýska konu í stólnum hjá mér. Hún talaði varla ensku en ég reyndi að útskýra fyrir henni að ef henni myndi líða illa á einhverjum tímapunkti þá ætti hún að láta mig vita, við myndum taka pásu, hún gæti hvílt sig og ég gefið henni smá nammi eða eitthvað. Hún kinkaði kolli en mér fannst smá skrýtið að hún talaði ekki.“
Olga var að húðflúra herðablað konunnar og sat á bak við hana. Allt í einu fór konan að halla sér meira fram og áttaði Olga sig á því að það væri að líða yfir konuna.
„Ég greip hana og hún byrjaði að hristast öll, hún byrjaði að æla og pissaði á sig. Hún missti síðan meðvitund. Hún lá á gólfinu og ég horfði á hana og hugsaði að við værum búnar í dag. Þetta var ógnvekjandi, en hún hefur verið flogaveik og ekki sagt neitt.“
Sá sem átti stofuna þar sem Olga var að húðflúra kom fram með hreinar buxur handa konunni og síðan var haldið áfram með tattúið.
„Ég hugsaði með mér hvort það væri eðlilegt að við værum að halda áfram. Ég sagði það sama við hana, að hún ætti að láta mig vita ef henni myndi byrja að líða illa,“ sagði Olga.
„Við byrjuðum og það leið aftur yfir hana.“
