Hún er smá, hún er víða og hún er skæð plága. Moskítóflugan finnst víða og veldur mismiklum leiðindum eftir því hvar við hittum hana fyrir. Hér í Norður-Evrópu veldur hún fyrst og fremst roða, bólgu og kláða en á öðrum stöðum getur hún borið með sér skæða sjúkdóma á borð vð malaríu og beinbrunasótt.
Margir hafa þó lent í því að verða verr fyrir bariðnu á plágunni en aðrir ferðafélagar. Nú gæti svarið líklega legið fyrir um hver ástæðan að baki því er. Samkvæmt rannsókn sem birtist í Journal of Medical Entomology sækir flugan meira í þá sem eru í blóðflokknum O, eða næstum tvisvar sinnum meira en þá sem eru í A flokki. Efni sem líkaminn losar frá sér sendir flugunni skilaboð um blóðflokk og flugan virðist heldur sækja í O-flokkinn en aðra. Þetta eru efni á borð við koltvíoxíð og mjólkursýra sem vöðvar okkar losa við áreynslu.
Moskítóflugan hefur frábæra sjón en heldur sig nærri jörðu til að forðast vind. Dökkir litir, til dæmis svartur, dökkblár og rauður, draga flugurnar að sér.
Rannsóknir á moskítóflugum hafa sýnt að flugan sækir meira í fólk sem er með hærri líkamshita, svo sem fólk sem hefur verið að stunda mikla hreyfingu eða drekkur áfengi. Allt sem veldur því að við í raun hitnum og svitnum. Fólk í yfirþyngd eða þau sem eru þunguð eiga til með að vera heitari en aðrir svo þau eru álitlegri í augum flugnanna. Ein rannsókn sýndi að þeir sem höfðu drukkið bara einn bjór voru líklegri til að vera bitnir en þeir sem höfðu ekkert áfengi smakkað. Eins laðast flugan að táfýlu.
Jonathan F. Day, prófessor í skordýrafræði við Háskólann í Flórída, segir að besta leiðin til að forðast bit sé að forðast alla áreynslu við sólarupprás og sólsetur. Eins sé gott að hylja eins mikið af húðinni og hægt er. Hann bendir eins á DEET flugnafælu en minnir á að fólk þarf að bera slíkt reglulega á sig, eða á um 90 mínútna fresti. Moskítóflugur eigi erfitt með mótvind svo viftur gera einnig sitt gagn. Hann bendir á að moskítóflugur laðast að asetoni, sérstaklega því sem kemur úr útöndunarlofti þeirra sem eru með sykursýki, eru fastandi eða hjá þeim sem borða lítið af kolvetnum.
Day segir að það versta sem fólk getur gert eftir að það er bitið er að klóra sér. Slíkt komi að stað keðjuverkun sem leiði til frekari kláða og ef fólk klórar sig til blóðs er hætt við sýkingu. Frekar ætti fólk að nota klaka til að kæla bitið, eða nota kláðakrem. Ofnæmistöflur geti eins komið að gagni.
Nánar má lesa um málið hjá Lifandi vísindum og Huffpost
