Víðir Reynisson, sviðstjóri almannavarna hjá ríkislögreglustjóra og frambjóðandi Samfylkingarinnar í komandi alþingiskosningum, fer um víðan völl i viðtali við nýjasta tölublað tímarits Landssambands lögreglumanna, Lögreglumaðurinn. Í viðtalinu, sem tekið var áður en tilkynnt var að Víðir yrði í framboði í kosningunum, ræðir hann m.a. opinskátt um veikindi sín en auk þess að hafa smitast af hinni alræmdu Covid19-veiru og snúið aftur eftir þau veikindi neyddist Víðir til að fara aftur í veikindaleyfi m.a. vegna andlegra veikinda. Víðir segir að hann hafi á tímabíli átt mjög erfitt.
Víðir var eins og vel kunnugt er í fremstu víglínu vegna þeirra umfangsmiklu aðgerða sem farið var í vegna Covid19-faraldursins. Hann smitaðist hins vegar sjálfur af veirunni, í nóvember 2020, í kjölfar þess að hann og eiginkona hans buðu fámennum hópi fólks í heimsókn á heimili sitt. Hlaut Víðir nokkra gagnrýni fyrir, í ljósi stöðu sinnar, en sagði að farið hefði verið eftir þeim samkomutakmörkunum sem þá voru í gildi. Veiran lék Víði nokkuð grátt. Hann segir svo frá í viðtalinu:
„Já, ég var frekar veikur. Ég var tekinn í skoðanir og þurfti að fá vökva í æð. Þetta fór í lungun á mér og ég var hundlasinn í smá tíma.“
Víðir segir að hann hafi verið heima í rúnlega 18 daga og eftir að hafa fengið jákvæðar niðurstöður úr mótefnamælingum snúið aftur til vinnu. Hann hafi hins vegar verið hóstandi og slappur og hafi á endanum farið heim aftur í nokkra daga í viðbót eftir að Már Kristjánsson yfirlæknir á Landspítalanum hefði haft samband, í kjölfar þess að hafa séð viðtal við Víði, og sagt að hann væri of veikur til að vera í vinnunni.
Eftir að mesta álaginu vegna ástandsins og aðgerðanna í Covid-faraldrinum lauk tók við álag vegna jarðhræringa á Reykjanesskaga og rýmingar Grindavíkur. Þetta langvarandi álag og eftirköst vegna Covid-smitsins fóru að taka sinn toll af Víði sem neyddist á endanum til að fara í lengra veikindaleyfi en eftir smitið:
„Það var sambland af þessu öllu sem fór illa í mig. Mótefnakerfið í mér er eitthvað bilað eftir þessi veikindi. Ég hef síðastliðið rúmt ár farið einu sinni í mánuði í inndælingu
mótefna. Það verður þannig að minnsta kosti næsta árið. Ég fór svo í sex vikur á Reykjalund, það var algjör „gamechanger“ hvað varðar það að byggja upp þrek og styrk á nýjan leik.“
Það var þó ekki eingöngu líkamlega heilsa Víðis sem snarversnaði heldur sú andlega líka:
„Þetta tók mjög á mig andlega líka. Ég varð þunglyndur og átti bara mjög erfitt. Sem betur fer höfum við í lögreglunni aðgang að stuðningskerfi í aðstæðum sem þessum. Ég nýtti mér félagastuðninginn og sálfræðiþjónustu en hef líka notað lyf. Þetta er allt á réttri leið og ég er búinn að sjá sólina fleiri daga en færri í lífinu að undanförnu.“
Víðir ræðir í viðtalinu einnig um þann sálfræðilega stuðning sem lögreglumönnum stendur til boða.
Viðtalið í heild er eins og áður segir í nýjasta tölublaði Lögreglumannsins sem hægt er að nálgast hér.
