Það var vel tekið á móti Höllu Tómasdóttur þegar hún mætti í Grósku eftir að fyrstu tölur úr forsetakosningunum voru kynntar í kvöld. Halla er með afgerandi forskot og þarf margt að gerast til að Halla verði ekki næsti forseti Íslands.

Höllu var hampað sem hetju þegar hún mætti á kosningavökuna í kvöld og hún ávarpaði samkomuna þegar hún mætti í hús. „Hvaða frambjóðandi er með fullan sal af fólki sem er í klútabyltingunni?“ sagði Halla sem er þekkt fyrir sína smekklegu hálsklúta.

Halla var þakklát fyrir stuðninginn og sagði að ekkert af þessu hefði getað gerst ef ekki væri fyrir þá frábæru stuðningsmenn sem hafa unnið að framboði hennar og stutt hana með ráðum og dáð. Halla minnti þó viðstadda á að enn ætti eftir að telja töluverðan fjölda atkvæða upp úr kjörkössunum.