„Míuverðlaunin eru verðlaun til að heiðra þá sem koma að þjónustu langveikra barna á einn eða annan hátt. Einhver sem hefur hjálpað eða stutt við þig og þína fjölskyldu á erfiðum tíma. Það sem þeim finnst vera „bara vinnan sín“ getur skipt sköpum fyrir aðstandendur langveikra barna og börnin sjálf. Hægt er að tilnefna heilbrigðisstarfsmann í hvaða starfsstétt sem er, hvar á landinu sem er,“ segir í tilkynningu um Míuverðlaunin.
Halldóra Kristín Þórarinsdóttir, sérfræðingur í krabbameins – og blóðlækningum barna á Barnaspítala Hringsins, hlaut Míuverðlaunin að þessu sinni.
Erna Hrund Hermannsdóttir, vörumerkjastjóri, afhenti Míuverðlaunin. Kynnar voru tónlistamaðurinn Gauti Þeyr og Apríl Lea dóttir hans. Míuverðlaunin í ár voru hönnuð af listakonunni Valdísi Ólafsdóttur sem hannar undir vörumerkinu litlu hlutir lífsins. Fallega orðið “hugrekki” sem hefur verið einkennisorð Mia Magic og er tekið úr fyrstu bókinni, Mía fær lyfjabrunn, var ritað á gripinn ásamt því að stærð lyfjabrunnar var sett í gripinn.
Verðlaunin voru afhent í fjórða sinn í gær við hátíðlega athöfn á Spritz Venue, Reykjavík. Tíu heilbrigðisstarfsmenn sem vinna með langveikum börnum voru heiðraðir á viðburðinum.
36 heilbrigðisstarfsmenn voru tilnefndir í ár. Ísbjörninn Hringur fékk tilnefningu í ár. Valnefnd Míuverðlaunanna valdi svo topp 10 hópinn sem heiðraður var á fallegum viðburði sem haldinn var af Mia Magic, sem er góðgerðarfélagið sem stendur á bak við þessi fallegu og einstöku verðlaun. Andrúmsloftið var einstakt á viðburðinum, gleðin í andlitum viðstaddra var mögnuð. Dimm verslun er aðalstyrktaraðili verðlaunanna í ár.
Halldóra ólst upp á stóru heimili þar sem eldri ættingjar gáfu yngri kynslóðinni bæði tíma og góð ráð. Halldóra lærði fljótt hversu mikilvægt það er að hlúa að heilsunni en hún ákvað tíu ára gömul að verða læknir í framtíðinni og að hún myndi eignast tvíbura, bæði gekk eftir.
Halldóra útskrifaðist sem-dux scholea frá Menntaskólanum í Reykjavík árið 1988 og útskrifaðist úr læknisfræðideild HÍ 1994. Hún vann í eitt ár á ýmsum deildum Landspítalans áður en hún fékk almennt læknisleyfi hérlendis. Halldóra hélt síðan út til Bandaríkjanna árið 2000 þar sem hún útskrifaðist sem almennur barnalæknir þremur árum síðar. Á meðan hún var í náminu ákvað hún að læra krabbameinslækningar barna og útskrifaðist sem krabbameins- og blóðsjúkdómalæknir barna árið 2006. Hún kom þá heim og hóf störf á barnaspítala hringsins og starfar enn þar í dag.
Á síðustu árum hefur hún einnig tekið þátt í setja á laggirnar Miðstöð síðbúinna afleiðinga krabbameina fyrir fólk sem læknaðist af krabbameini í æsku og sem fylgja þarf eftir með til dæmis forvörnum og fræðslu. Hún er í alþjóðasamtökum barnakrabbameinslækna og einnig í samtökum norræna barnakrabbameinslækna.
Míuverðlaunin eru hluti af félagi sem ber nafnið Mia Magic og er stofnað af Þórunni Evu G. Pálsdóttur eftir að hún gaf út bókina Mía fær lyfjabrunn. Fríða Björk Arnardóttir, framkvæmdastjóri Neistans, félags hjartveikra barna stofnaði verðlaunin með Þórunni Evu árið 2021.
Tíu manna hópurinn fékk gjafapoka sem styrktir voru af Húrra Reykjavík, Danól, Skjaldböku heildverslun og svo fengu allir Míunælu til að bera. „Míu nælan er orðin svo stór hluti að heilbrigðiskerfinu og er svo gaman að heyra sögurnar sem fólk hefur að segja um þær. Í stuttu máli, einstaklingar finna til öryggis þegar þeir sjá starfsmann með Míunælu og sama á við með Míu tengdan varning eins og hálsböndin og kortahaldarana. Fullorðin kona á leið í blóðprufu sá starfsmann, sem kom ekki að umönnum hennar, bera Míu hálsband og fylltist hlýju,“ segir Þórunn Eva.
