Ástsæli bandaríski leikarinn Tim Allen er best þekktur fyrir að leika jólasveininn í The Santa Clause kvikmyndunum og handlagna heimilisföðurinn í þáttunum Home Improvement á tíunda áratugnum. Hann sló einnig í gegn í Christmas with the Cranks árið 2004 og sem rödd Bósa Ljósárs í Toy Story 1 til Toy Story 4.

En leikarinn á skrautlegan brotaferil að baki og litlu munaði að hann hefði eytt lífi sínu á bak við lás og slá í stað þess á hvíta tjaldinu.

Tim Allen var fíkniefnasmyglari þegar hann var á þrítugsaldri. Í október 1978 var hann gripinn glóðvolgur með 700 grömm af kókaíni á Kalamazoo-flugvellinum í Michigan. Hann átti yfir höfði sér lífstíðarfangelsi en með því að bera vitni gegn félögum sínum og öðrum glæpamönnum endaði hann á því að fá einungis tveggja og hálfs árs dóm. Hann sat inni í tvö ár og fjóra mánuði, losnaði þann 12. júní 1981.

Eftir að Allen losnaði úr fangelsi sneri hann við blaðinu og áratug síðar fékk hann stóra tækifærið sitt þegar hann landaði aðalhlutverkinu í Home Improvement. Þættirnir urðu einir af vinsælustu þáttum tíunda áratugarins og skutu Allen upp á stjörnuhimininn.

Þrátt fyrir frægð og frama glímdi Allen við áfengis- og fíknivanda. Hann sagði að sviplegt fráfall föður hans þegar hann var 11 ára, sem lést í bílslysi eftir að ölvaður ökumaður keyrði á hann, hafi haft áhrif á drykkjuna. Árið 1997 var hann handtekinn fyrir að keyra undir áhrifum áfengis. Árið 1998 fór hann í meðferð eftir að hafa verið ákærður fyrir ölvunarakstur. Allen hefur verið edrú síðan þá, í tæplega 25 ár.