Kona sem pantaði grímubúning fyrir öskudaginn fyrir son sinn hjá íslenskri verslun varð ansi svekkt þegar gallinn barst og taldi sig ekki hafa fengið vöruna sem auglýst var. 

„Búningurinn með appelsínugula á öxlinni er myndin sem er á vefsíðunni og hann er greinilega með mikið af bólstruðum eða þykkum hlutum víða, og er sýndur með hönskum og fótabúnaði. Það kemur ekkert fram á síðunni að einhverjir hlutir á myndinni fylgi ekki með. Ég reiknaði svo sem ekki með að byssan fylgdi með, en reiknaði með að það sem væri hluti af búningnum væri með,“ segir konan í færslu í hópnum Neytendahornið á Facebook.

„Búningurinn sem við fengum og  barnið er í á myndinni er þunnur áprentaður galli með bólstruðu belti og hvítum léttbólstruðum aukastykkjum á efri handlegg. Sjá myndir.  Mynduð þið segja að ég hafi fengið það sem ég borgaði fyrir?“

Augljóst er að gallinn sem barst er er lakari að gæðum en myndin lofar og ekki eins spennandi. Segir konan að hún hafi greitt 8.990 kr. Fyrir gallann, en þó hún geti skilað vörunni, þá sé ekki líklegt að sonurinn finni annan galla sem honum líkar betur við eða í hans stærð.

Flestir benda konunni á að skila vörunni, ekki sé um sambærilega vöru að ræða og lofað er á mynd.

„Þetta er ekkert annað en villandi auglýsing á vöru sem er ekkert í líkingu við það sem auglýst var. Svona næstum því eins og að panta fjórhjólaferð en fá göngutúr um svæðið,“ skrifar ein í athugasemd.

Málið leystist farsællega þar færslunni var komið á framfæri við verslunina og segir verslunarstjóri í athugasemd:  „Þegar við fengum veður af þessari umræðu brugðumst við strax við, þarna hafði birginn okkar sent okkur ranga mynd. Við leggjum mikið upp úr því að vera með réttar upplýsingar á síðunni okkar og þykir okkur þetta miður. Erum búnar að hafa samband við og leysa málið.“