Hægt er að hlusta á hlaðvarpið í heild sinni hér:
Einnig er hægt að hlusta á Spotify eða hlaðvarpsþjónustu Google.
Ellý Ármanns, ein eftirsóttasta spákona landsins, mætti með tarot-spilin í áramótaþátt Fókuss og spáði fyrir nokkrum þekktum einstaklingum, þar á meðal Katrínu Jakobsdóttur forsætisráðherra. En ekki nóg með það, þá spáði hún einnig fyrir framtíð ríkisstjórnarinnar.
Við spurðum: „Undanfarið hafa óvinsældir hennar aukist, hvernig mun hún höndla þetta mótlæti?“
„Hún höndlar þetta alveg. Hún er vel brynjuð og miklu sterkari en við höldum. Hún er með töluna tíu, hún heldur á rosalega mörgum verkefnum. Hún er með alltof mikið í fangi sér,“ segir Ellý og bætir við að Katrín þurfi fleiri aðstoðarmenn og fleira fólk með sér.
„Þegar þetta leysist allt saman með Ásgeir og það sem er í gangi hérna, mun hún hækka í vinsældum og hún veit að þetta er upp og niður.“
Ellý er þá að vísa í spá hennar fyrir Ásgeir Jónsson, seðlabankastjóra. Lestu um það hér.
Ellý segir Katrínu vera saklausa og ljúfa, en rosalega sterka. „Við þurfum þessa konu,“ segir hún.
En hvað með ríkisstjórnina? Við spurðum spákonuna: „Mun ríkisstjórnin lifa af næsta ár?“
„Nei, það eru einhverjar rosalegar hræringar, allt er öðruvísi en við höldum þegar við horfum fram á við. Þetta er ekki dauði en þetta er breyting. Það er að segja, eitthvað þarf að deyja, þetta er ekki mannslíf, höfum það á hreinu. Eitthvað þarf að hætta svo að annað getur byrjað,“ segir hún.
„Þetta verður rosalegt, eitthvað allt annað en við höldum. Það er ein kona sem er rosalega sterk, brjálæðislega greind og hún á eftir að breyta þessu landslagi í pólitíkinni. Ég held að það verði Kristrún Frostadóttir [formaður Samfylkingarinnar]. Hún á eftir að kalla fram breytingar, ég veit ekki hvernig hún mun fara að þessu en hún verður einhver lykilmanneskja í því að eitthvað breytist svo annað geti hafist.“
Horfðu á Ellý spá fyrir Katrínu og ríkisstjórninni í spilaranum hér að ofan. Brotið er hluti af áramótaþætti Fókuss sem má horfa á í heild sinni hér.
