Reykjavík – glæpasaga eftir Ragnar Jónasson og Katrínu Jakobsdóttur fór í gærkvöldi í fyrsta sætið í Kindle-verslun amazon.co.uk og er þar með mest selda rafbókin á vefnum. Enn situr bókin sem fastast á toppnum.

Reykjavík hefur verið afar vel tekið austan hafs og vestan.  Sunday Times sagði að bókin væri „afar læsileg ráðgáta sem hélt mér allan tímann,“ og gagnrýnandi Financial Times sagði: „norrænar glæpasögur gerast ekki betri.“ Þá skrifaði gagnrýnandi New York Times að sagan væri „óaðfinnanlega fléttuð, með stórkostlegum persónum og fjölmörgum vel undirbyggðum vendingum,“ og valdi hana sem eina af fjórum athyglisverðustu glæpasögunum sem komu út í Bandaríkjunum í september. 

New York Post valdi Reykjavík sem eina af sex bestu bókum vikunnar og í aðdraganda útgáfunnar í Bandaríkjunum skrifaði gagnrýnandi Kirkus Review: „Þessi hefði glatt Agöthu Christie.“ Boston Globe sagði að bókin væri mjög góð og um miðbikið kæmu vendingar sem myndu skekja lesandann. Raunar hefur hróður bókarinnar borist alla leið til Ástralíu en gagnrýnandi  Sydney Morning Herald skrifaði að verkið væri gallalaust. Þá lét breski rithöfundurinn Anthony Horowitz svo um mælt að Reykjavík væri „glæsilega samin ráðgáta eftir tvo stórsnjalla glæpasagnahöfunda.“