Ásgrímur Geir Logason er lærður leikari og heldur úti einu vinsælasta hlaðvarpi landsins, Betri helmingurinn með Ása. Hann ákvað fyrir stuttu að láta gamlan draum rætast og læra hársnyrtinn.

Ásgrímur er gestur vikunnar í Fókus, spjallþætti DV, í umsjón Guðrúnar Óskar Guðjónsdóttur.

Ásgrímur er uppalinn í Smárahverfinu í Kópavogi. Hann lýsir sjálfum sér sem nokkuð stilltum og rólegum dreng sem æfði samkvæmisdans. Með aldrinum fór hann að hafa áhuga á söng og leiklist og setti fyrst stefnuna á tónlistarbransann.

Sú stefna breyttist á lokaári hans í Verzlunarskóla Íslands þegar kennari hvatti hann til að fara í prufur fyrir Listaháskóla Íslands. „Ég kýldi á það og komst miklu lengra en ég bjóst við,“ segir hann.

Tveimur árum síðar lá leið Ásgríms til Lundúna þar sem hann lærði leiklist við Rose Bruford-skóla.

Síðan þá hefur hann sinnt alls konar verkefnum, leikstýrt, kennt og ýmislegt fleira. Hann byrjaði með hlaðvarpsþættina Heitt á könnunni og Betri helmingurinn með Ása fyrir nokkrum árum sem hafa notið gífurlega vinsælda. En í haust ákvað hann að breyta um stefnu og láta gamlan draum rætast.

„Hárgreiðsla hefur alltaf blundað í mér. Ég hugsaði þetta þegar ég var að klára grunnskólann á sínum tíma en mig langaði þá svo mikið í Verzló, út af öllum þessum söngleikjum og öllu því, að ég fór þá leiðina,“ segir hann.

Rétti tíminn var núna

Ásgrímur sá að Hárakademían býður upp á hraðnám og ákvað að skrá sig.

„Þannig ég hugsaði að þarna væri tækifærið til að láta þennan draum verða að veruleika […] Svo er líka núna búið að stytta samninginn eftir skóla, þannig þetta var svona rétti tíminn til að taka þetta skref,“ segir hann og bætir við að með þessu sé hann einnig að búa til ákveðið öryggisnet fyrir sig og fjölskyldu sína.

„Það getur verið svolítið taugatrekkjandi að vinna í heimi þar sem ég stjórna ekkert alltaf ferðinni. Hvort sem það er að fá gesti í viðtöl, það hefur alveg komið fyrir að ég er bara mættur upp í stúdíó, síðan hringir síminn og [viðmælandi þarf að afbóka]. Þá fær maður bara panikk. Þetta er ótrúlega taugatrekkjandi umhverfi að vinna í, eins bara með leiklistina. Það er engan veginn mér háð, hvort ég fái hlutverk eða hvernig það gengur allt saman.“

Horfðu á þáttinn í heild sinni hér að ofan.

Fylgdu Ásgrími á Instagram og hlustaðu á Betri helminginn með Ása hér.