Hver Íslendingur sefur hjá 13 manns yfir ævina að meðaltali. Það er það fjórða mesta í heiminum.
Þetta kemur fram í talnaefni lýðfræðivefsins World Population Review.
Meðaltal heimsins, eða þeirra landa sem talnaefnið nær yfir, eru 9 bólfélagar og eru Íslendingar því nokkuð mikið yfir því.
Almennt séð eiga íbúar í vestrænum ríkjum fleiri bólfélaga yfir ævina en íbúar í þróunarríkjum. Kemur því nokkuð á óvart að Tyrkir trjóna á toppi listans með 14,5 bólfélaga. Þar á eftir koma Ástralar með 13,3 og Nýsjálendingar með 13,2.
Þá vekur nokkra athygli að Danir eiga langfæsta bólfélaga á Norðurlöndunum, 9,3. Finnar eiga 12,4 bólfélaga, Norðmenn 12,1 og Svíar 11,8.
Á meðal annarra þjóða sem eru yfir meðaltali eru Suður Afríkumenn (12,5), Ítalir (11,8), Bandaríkjamenn (10,7), Tælendingar (10,6), Japanir (10,2) og Bretar (9,8).
Rússar, Brasilíumenn og Mexíkóar eru akkúrat í meðaltalinu. En undir því eru meðal annars Frakkar (8,1), Hollendingar (7), Spánverjar (6,1), Pólverjar (6) og Þjóðverjar (5,8).
Indverjar eru á botninum með aðeins 3 bólfélaga yfir ævina. Kínverjar eru ekki langt á eftir með 3,1 en þetta eru einmitt tvær langfjölmennustu þjóðir heimsins. En í löndum eins og Indlandi eru mjög ströng félagsleg gildi um að fólk stundi ekki kynlíf fyrir hjónaband.
Þó að mörgum finnist 3 kannski vera ansi lítið þá er það reyndar hin fullkomna tala, að minnsta kosti samkvæmt breskri rannsókn frá árinu 2016. Var hún unnin af vísindamönnum við Nottingham, Bristol og Swanseaháskóla og birt í tímaritinu Journal of Sex Research.
„Væntanlegur maki sem hefur umfangsmikla kynferðislega fortíð er tölfræðilega slæmur kostur sem tryggur langtímamaki,“ sagði Steve Stewart-Williams, doktor við Nottingham háskóla eins og DV greindi frá á sínum tíma.
Í rannsókninni kom meðal annars fram að konum finnist karlmenn síður aðlaðandi sem hafa sofið hjá 6 einstaklingum eða fleirum. 3 væri ákjósanlegur fjöldi hjá báðum kynjum. Meðalfjöldi bólfélaga hjá þátttakendum var hins vegar nokkuð hærri, það er 5,8 hjá konum og 8,4 hjá körlum.
