Marie Kondo hefur gefið út fjórar bækur sem hafa selst í milljónum eintaka um heim allan og hún var með vinsæla þætti á Netflix, Tidying Up With Marie Kondo, þar sem hún kenndi fólki að grisja líf sitt, heimili og vinnustaði af hlutum sem færðu þeim enga hamingju og skipuleggja sig.
Samkvæmt Washington Post hefur þrifglaða skipulagsséníið lært að taka drasli fagnandi. Hún er núna þriggja barna móðir og það yngsta er tæplega tveggja ára.
„Það er drasl heima hjá mér, en hvernig ég eyði tíma mínum núna er það rétta fyrir mig þessa stundina,“ segir hún.
„Ég var atvinnumanneskja í tiltekt, þar til nú. Ég reyndi að halda heimilinu mínu alltaf hreinu en ég hef eiginlega gefist upp á því, sem er jákvætt. Ég áttaði mig á að það er mikilvægara að eyða tíma með börnunum mínum.“
View this post on Instagram
Marie Kondo hefur áður opnað sig um erfiðleikana við að halda hreinu heimili með börn. „Þegar ég varð fyrst móðir þá varð ég pirruð að ég gat ekki tekið til heima hjá mér alveg eins og ég vildi. Síðan eignaðist ég annað barn og þá hafði ég ekki einu sinni orkuna til að sinna þeim heimilisverkefnum sem ég var vön að gera. Mæðrahlutverkið hefur kennt mér að vera þolinmóðari við mig sjálfa. Gleðin við að vera foreldri er miklu betri en hreint heimili,“ sagði hún í bloggfærslu árið 2019.
