Leikarinn heimsfrægi Jamie Foxx, sem meðal annars hefur hlotið Óskarsverðlaunin, hefur beðist afsökunar á færslu sem hann setti á Instagram-síðu sína og hefur hann eytt færslunni.

Foxx, sem er 55 ára gamall skrifaði í færslunni:

„Þeir drápu þennan gaur sem hét Jesús. Hvað heldurðu að þeir geri við þig?“

Lesendur síðu leikarans skildu eftir athugasemdir þar sem þeir sögðu færsluna einkennast af gyðingahatri. Algengt er meðal þeirra sem af einhverjum ástæðum hatast út í Gyðinga að saka þá sem heild um að hafa orðið Jesú Kristi að bana.

Rómversk kaþólska kirkjan hafnaði þessari hugmynd formlega árið 1965.

Foxx bað samfélag Gyðinga afsökunar á þessari færslu með nýrri færslu á Instagram.

Í nýju færslunni sagðist hann vita að orðaval sitt hefði verið móðgandi. Það hefði ekki verið ætlunin. Hvatinn að færslunni hefði verið sá að hann hefði verið svikinn af einstaklingi sem hann taldi vera vin sinn. Það var það sem hann hefði átt við með orðinu „þeir“ og ekkert meira en það.

Önnur kvikmyndastjarna, Jennifer Aniston, var gagnrýnd fyrir að líka við hina umdeildu færslu Foxx en hún gaf út yfirlýsingu á sinni Instagram-síðu þar sem hún lýsti yfir andúð á gyðingahatri.

Það var BBC sem greindi frá.