Breski grín­ist­inn og YouTu­be-stjarn­an Max Fosh setti sér það markmið árið 2021 að elda tilbúinn rétt í virku eldgosi. Þegar gos hófst við Litla-Hrút á dögunum dreif Fosh sig í brók, fjárfesti í flugmiða til Íslands og gekk að eldgosinu við Litla-Hrút til að ná markmiði sínu. 

Fosh eldaði þar „heimsins heitasta karrírétt“ sem var indverskur frosinn og tilbúinn réttur, Chicken Korma, sem hann keypti auðvitað í Iceland verslun í Bretlandi.  Fosh var kominn í loftið nokkrum klukkustundum eftir að hann fékk tilkynningu um að gos væri hafið og lenti á Keflavíkurfugvelli kl. 23.30 um kvöld.

Christoph­er Horsley eldfjallaáhugamaður var Fosh til aðstoðar við þessa sérstöku eldamennsku. 

Á YouTube-síðu Fosh má sjá nærri 12 mínútna myndband um ferðalagið til Íslands og eldamennskuna, en Fosh er með rúmlega tvo milljón fylgjendur á YouTube. „Jesús, það er allt Ísland hérna, þetta er eins og Glastonbury,“ segir Fosh um mannfjöldann sem mættur var til að þramma að gosinu. 

„Færum til bókar að við erum að leggja af stað klukkan 01.05,“ segir Fosh. „Þetta er það klikkasta sem ég hef nokkurn tíma gert á þessum reikningi og ég er ekki einu sinni byrjaður að elda,“ segir hann þegar Horsley gengur nær gosinu til að kanna aðstæður.

Strákarnir gleymdu gasgrímum og fati til að elda réttinn í, en Horsley var ekki lengi að redda málunum og útbjó fat úr Monster dós. 

„Þetta er eldað og mjög gott. Þetta er góður kjúklingur sem ég var að enda við að elda í virku eldfjalli.“

Við mælum með að apa athæfi Fosh ekki eftir og fara að fyrirmælum Almannavarna og viðbragðsaðila við gosstöðvarnar.