Samband evrópska sjónvarpsstöðva (EBU) hafði boðað breytingar á fyrirkomulaginu þegar tilkynnt er í undanúrslitunum hvaða lönd hafa komist áfram. Stóð til að flytjendur myndu allir standa upp á sviðinu þegar úrslitin yrðu tilkynnt.

Þessar breytingar voru svo dregnar til baka.

Gísli Marteinn Baldursson, sjónvarpsmaður, er sem stendur staddur í Liverpool þar sem Eurovision-söngvakeppnin fer fram, en keppnin hefst formlega á morgun á fyrra undanúrslitakvöldi. Hann deildi smá Euro-frétt þar sem hann rakti hvers vegna EBU hætti við nýja fyrirkomulagið.

„Það stóð til að tilkynna hver kæmust áfram á morgun og fimmtudaginn með því að hafa listamennina uppá sviði – Idol style. Engar bakraddir eða dansara. Og þau sem kæmust áfram færu af sviðinu eitt og eitt. Eftir stæðu svo bara þau sem kæmust ekki.

Þetta var svo prófað í dag og aðdáendur keppninnar (og ýmis hærra sett) mótmæltu svo hraustlega að það var hætt við og þetta veðrur gert einsog venjulega með öll í græna. Mikil gleði með þessa breytingu og að yfirstjórnin hafi hlustað.“

Þetta var prófað í dag og aðdáendur keppninnar (og ýmis hærra sett) mótmæltu svo hraustlega að það var hætt við og þetta verður gert einsog venulega með öll í græna. Mikil gleði með þessa breytingu og að yfirstjórnin hafi hlustað. 2/2 #12stig

— Gísli Marteinn (@gislimarteinn) May 8, 2023

Vísar Gísli þar til þess að áfram muni keppendur sitja á sérstöku svæði sem gjarnan er kallað græna herbergið, þó svo að undanfarin ár hafi það verið sérstaklega afstúkaður staður í aðalsalnum. Flytjendur munu því geta setið með öðrum úr sínum hóp.

Líklega hefði líka verið hálf pínlegt þegar aðeins þeir sem ekki kæmust áfram væru einir eftir á sviðinu eftir að öll lönd hefðu verið lesin upp. Það virkar kannski í Idol, en Eurovision er í eðli sínu ekki jafn amerískt og sú keppni.

Við munum enn eftir svipnum á breska keppandanum þegar tilkynnt var árið 2021 að hann hefði ekkert stig fengið úr áhorfendakosningunni. Hann hafði þó allavega hópinn sinn með sér til stuðnings. Af samfélagsmiðlum mátti dæma að áhorfendum þótti erfitt að þurfa að horfa upp á vonbrigðin. Svo ekki er á það bætandi að leggja það á okkur að ganga í gegnum þetta á undanúrslitakvöldunum líka.