Priyanka opnar sig um ástina og sambönd í hlaðvarpsþættinum Armchair Expert.
Hún rifjar upp þegar hún kynntist Nick. „Ég var þá í stormasömu sambandi. Þetta var árið 2016. Ég og Nick áttum sameiginlega vini sem vildu ekki að ég væri í þessu sambandi og voru að segja mér að Nick væri líka á lausu. Við vorum bæði í flóknum aðstæðum,“ segir hún.
Hún nefnir ekki fyrrverandi kærasta sinn á nafn en segir að sambandið hafi verið á lokametrunum þegar Nick sendi henni skilaboð á samfélagsmiðlum. Hún var samt ekki viss um söngvarann.
„Ég var 35 ára og hann var 25 ára. Ég gerði ráð fyrir því að hann vildi ekki það sama og ég. Ég var tilbúin til að stofna fjölskyldu og skapa mér framtíð með einhverjum, ég var tilbúin í eitthvað alvarlegt,“ segir hún.
En það kom í ljós að þau vildu bæði sömu hlutina og ástin blómstraði. Þau giftust árið 2018 og eiga saman dóttur.
Áður en Priyanka fann ástina í örmum Nick gekk illa hjá henni í ástarmálum.
„Ég gerði alltaf sömu mistökin. Það var alltaf sama mynstrið, mér fannst eins og þeir væru að gaslýsa mig því ég eiginlega gaf þessa orku frá mér, að manneskjan sem ég var með var í fyrsta sæti,“ segir hún.
