Guðrún nokkur er mikill aðdáandi tveggja þáttaraða sem Stöð 2 hefur sýnt á undanförnum árum. Reyndar er Guðrún svo mikið fyrir þessar tvær þáttaraðir að hún ákvað að senda aðsenda grein í Morgunblaðið til að freista þess að fá fleiri þætti.
Þáttaraðirnar sem um ræðir eru Allir geta dansað og Ísskápastríð. „Ég undirrituð skora á dagskrárstjórn Stöðvar 2 að gera fleiri þáttaraðir af Ísskápastríði, þeim frábæru þáttum, og líka Allir geta dansað,“ segir Guðrún í pistlinum sem um ræðir en pistillinn bæði hefst og lýkur með þessari einu setningu. Guðrún er nefnilega ekkert að flækja hlutina þegar kemur að uppáhalds þáttunum hennar og kemur sér bara beint að efninu.
Síðasta þáttaröð af Allir geta dansað kom út árið 2020 og því hefur Guðrún beðið í um 2 ár eftir nýjum dansþáttum. Sem betur fer fyrir Guðrúnu er búið að framleiða nýja þáttaröð af Ísskápastríð á hverju ári síðan það kom fyrst út árið 2016. Guðrún getur því horft á þá þætti nokkuð langt aftur í tímann á meðan hún bíður eftir næstu þáttaröð.
Nú krossar Guðrún eflaust fingur og vonar að Þórhallur Gunnarsson, dagskrárstjóri Stöðvar 2, lesi pistilinn og taki hann til greina á næsta fundi um dagskrá Stöðvar 2.