Vanda Sigugeirsdóttir, formaður KSÍ, er í viðtali við helgarblað Fréttablaðsins. Vanda varð fyrst kvenna hér á landi til að þjálfa karlalið í knattspyrnu og fyrst kvenna í Evrópu til að taka að sér formennsku knattspyrnusambands er hún varð formaður KSÍ í haust. Í næsta mánuði verður að nýju kosið um formann sambandsins og hyggst Vanda gefa kost á sér áfram.
Í viðtalinu greinir Vanda frá því að eiginmaður hennar, Jakob Frímann Þorsteinsson, gekk mjög lengi á eftir henni áður en hann náði að vekja áhuga hennar á sambandi en í dag eiga þau þrjú börn og reka saman fyrirtæki ásamt öðrum hjónum, námskeiðaþjónustuna Kvan.
„Hann var með permanent og spangir þegar við hittumst auk þess sem hann var fjórum árum yngri en ég. Ég hef oft sagt börnum mínum að það sé algjörlega pabba þeirra að þakka að við séum öll þar sem við erum í dag. Hann hefur sagt það sjálfur að hann fann að ég ætti að verða konan hans og eltist við mig árum saman. Mér fannst erfitt að allir vinir okkar vissu að hann væri hrifinn af mér og var því ekkert alltaf voða næs – átti líka annan kærasta á tímabili. Hann bara beið og beið og aðra eins þrautseigju hef ég varla heyrt um, sem betur fer,“ segir Vanda.
Vanda segist hafa séð hversu frábær Jakob var þegar hún hætti að ofhugsa málið og spá í álit annarra:
„Þegar ég svo hætti að ofhugsa þetta og hugsa um hvað öðrum fannst, varð ég ástfangin af honum. Ég setti niður varnirnar og leyfði mér að sjá betur hversu frábærlega frábær hann er.“
