Fjölmiðlamaðurinn Frosti Logason er svo sannarlega kominn út fyrir þægindaramann en hann stundar nú sjómennsku á línubátnum Vésteini GK. Hann hefur sagt skilið við fjölmiðlasamsteypuna Sýn en segist alsæll með hið nýja verkefni „Þetta er rosalegt ævintýri. Mig hefur alltaf dreymt um að prófa þetta en aldrei tími til fyrr en núna,“ segir Frosti í viðtali við Mannlíf.
Þar kemur fram að Frosti sé búinn að fara í tvo túra og hafi áhöfnin mokveitt. Þá virðist Frosti blessunarlega laus við sjóveiki og er hinn hressasti í öldurótinu. Hann telur því að hinn nýi starfsvettvangur eigi afar vel við hann.