Elon Musk, ríkasta maður heims, er sagður hafa eignast tvíbura á síðasta ári með háttsettri samstarfskonu í einu af fyrirtækjum auðkýfingsins. Þetta kemur fram í umfjöllun Business Insider.
Í umfjöllun miðilsins kemur fram að barnsmóðir Musk heiti Shivon Zilis og er háttsettur stjórnandi í fyrirtækinu Neurolink en markmið þess er að koma fyrir tölvuflögu í heila mannfólks og tengja einstaklinga þannig við internetið. Starfsemin er umdeild í ljósi þess að tæknin hefur verið prófuð á dýrum með miður góðum árangri á köflum.
Umfjöllun Business Insider byggist á gögnum þar sem fram kemur að sótt hafi verið um í apríl á þessu ári að tvíburarnir litlu beri eftirnafn Musk, og hann þar með faðir þeirra, og fjölskyldunafn Zilis sem millinafn. Beiðnin var síðan samþykkt í maí.
Zilis, sem er 36 ára og frá Kanada, hóf að starfa fyrir fyrirtæki Musk, OpenAI, árið 2016. Áður hafði hún starfað fyrir fjárfestingasjóð sem kom henni á lista Forbes yfir eftirtektarvert fólk undir þrítugu.
Fyrir þessi tíðindi hafði Musk feðrað átta börn. Sex þeirra með fyrrum eiginkonu sinni, Justine Wilson. Fyrst eignaðist parið barn árið 2002 sem dó vöggudauða aðeins 10 vikna. Tveimur árum síðar eignuðust hjónin tvíbura og árið 2006 eignuðust þau þríbura með hjálp tæknifrjóvgana.
Þá eignaðist Musk tvö börn með tónlistarkonunni Claire Boucher, betur þekkt sem Grimes. Seinna barn þeirra kom í heiminn árið 2021 með hjálp staðgöngumóður..