Kate Middleton er eflaust orðin vön því að fólk stari á sig eftir að hún giftist erfingja krúnunnar í Bretlandi. Hún fær þó víst ekki jafn mikla athygli og venjulega þegar hún sækir börn sín á leikskólann.

Börn hennar og William prins, þau George og Charlotte, eru á afar fínum og dýrum leikskóla en þau eru ekki einu börnin á leikskólanum sem eiga fræga foreldra. Samkvæmt foreldri barns á leikskólanum sem ræddi við DailyMail þá fær ein móðir barns á leikskólanum sem mun meiri athygli en Kate.

„Það horfir í rauninni enginn á Kate þegar hún kemur að sækja á leikskólann,“ segir foreldrið. Þessi móðir sem foreldrið er að tala um er nærfatafyrirsæta en foreldrið segir feðurna sem sækja á leikskólann horfa sérstaklega mikið á hana. „Við erum með nærfatafyrirsætu frá Victoria’s Secret sem kemur að sækja barnið sitt á leikskólann, pabbarnir hafa miklu meiri áhuga á henni.“

Ekki er búið að greina frá því hvaða nákvæmlega fyrirsætu um er að ræða en hún er líklega með þeim frægari þar sem gjöldin í leikskólanum eru nokkuð há. Það kostar rúmar 3,3 milljónir að vera með barn á leikskólanum og því er hægt að gera ráð fyrir því að það sé nóg til hjá umræddri fyrirsætu.