Rostungurinn Valli, sem hefur sigrað hjörtu landsmanna eftir að hann gerði sig heimkominn á höfninni á Höfn í Hornafirði hefur birst á ný, nú á stefnumótaforritinu Smitten.
Þar segist Valli vera um 1200 kg að þyngd, hann hafi stundað nám í skóla hafsins og segir að skemmtileg staðreynd um sig sé að hann hafi nýlega verið kosinn „vondi strákur Hafnar í Hornafirði“
Davíð Örn Símonarson, framkvæmdastjóri Smitten, segist hafa gaman af þessu uppátæki.
„Við höfum nú ekki lagt það í vana okkar að leyfa svona notendur, en Valli vermir hjörtu okkar allra á þessum síðustu og verstu. Þegar náttúran gerir haglárás í september er erfitt að taka Valla rostung, ljósið okkar í skammdeginu úr umferð. Ætli við leyfum þessu ekki að hanga í viku,“ segir í skemmtilegri tilkynningu Smitten til fjölmiðla.
Smitten er stefnumótaforrit fyrir „núll-kynslóðina og alla þá sem vilja njóta þess og hafa gaman af því að vera einhleypur“ og var gefið út í september á síðasta ári og í dag nota þúsundir Íslendinga forritið á degi hverjum. „Það hefur orðið sprenging í virkni eftir að við uppfærðum appið og núna eru notendur að svæpa (e. Like & Trash) rúmlega milljón sinnum í viku og senda marga tugi þúsunda skilaboða,“ er haft eftir Davíð í tilkynningu.
Notendur Smitten sem vilja tengjast Valla rostung geta fundið síðu hans hér.