Velska söngkonan Lisa Scott-Lee fagnaði nýlega 17 ára brúðkaupsafmæli með eiginmanni sínum, enska söngvaranum Johnny Shentall-Lee. Lisa og Johnny reka saman leiklistarskóla og eru því saman nánast allan sólarhringinn, þau vinna saman og búa saman.
Það að vera saman allan sólarhringinn alla daga vikunnar getur eflaust tekið á sum pör en Lisa er með ráð til að láta það virka.
„Við höfum gert reglu um að það megi ekki tala neitt um starfið í svefnherberginu,“ segir Lisa í samtali við The Sun. Þá bætir hún við að þau geri allt sem í þeirra valdi stendur til að halda rómantíkinni og vinnunni frá hvoru öðru.
Lisa og Johnny kynntust skömmu fyrir síðustu aldamót en þá var Johnny að sækja um að vera bakgrunnsdansari með hljómsveit Lisu, Steps. „Ég var yfir mig hrifin og svo dansaði hann og það var augnablikið sem hann náði mér. Ég varð hrifin af honum um leið,“ segir Lisa.
5 árum eftir að þau kynntust þá giftu þau sig og eftir það komu svo börnin þeirra tvö, Jaden, sem nú er 13 ára gamall, og Star Lily, sem er 11 ára gömul. Þau búa nú í Dubai og hafa gert það síðan árið 2011 en árið 2014 komu þau leiklistarskólanum sínum á laggirnar þar.