Óhætt er að fullyrða að tyrkneskir fjölmiðlar logi útaf fregnum af ástarsambandi íslenska auglýsingaleikstjórans Þórhalls Sævarssonar og Dilan Çiçek Deniz. Turtildúfurnar voru saman í fríi í sumarleyfisparadísinni Bodrum á dögunum og hafa myndir af þeim í ástaratlotum birst í helstu fjölmiðlum landsins.
Þar á meðal í miðlinum Haber Turk, Posta og Sabah Günaydin svo einhverjir séu nefndir.
Þórhallur, sem á alþjóðlegum vettvangi gengur undir nafninu Thor Saevarsson, er farsæll auglýsingaleikstjóri sem hefur um árabil verið búsettur erlendis vegna vinnu sinnar, lengst af á Ítalíu. Hann hefur leikstýrt auglýsingum fyrir mörg stærstu vörumerki heims en í fréttum af ástarævintýrinu ytra hefur komið fram að hann hafi verið með annan fótinn í Tyrklandi vegna vegna margvíslegra verkefna undanfarið.
Deniz, sem er 26 ára gömul, hefur unnið sér það til frægðar í Tyrklandi að hampa titlinum Miss Universe Tyrkland árið 2014 og hefur síðan hefur hún átt velgengni að fagna sem fyrirsæta í auglýsingum sem og leikkona í sjónvarpsþáttum og kvikmyndum.
Tyrkneskir fjölmiðlar gera talsvert úr því að með því að hafa opinberað ástarsambandið við Þórhall sé ástarsambandi Deniz við landa sinn og glaumgosann Alihan Aloğlu lokið. Parið bjó saman í átta mánuði og því virðist það hafa komið fjölmiðlum ytra í opna skjöldu þegar íslenski kærastinn skaut upp kollinum.