Það ætti ekki að koma neinum á óvart að margt sem við sjáum á samfélagsmiðlum er lygi. Myndum er breytt í forritum eins og Photoshop og FaceTune. Það leiðir til þess að fólk ber sig saman við óraunhæfa fegurðarstaðla og getur það haft verulega neikvæð áhrif á líkamsímynd, sérstaklega ungra kvenna.
Raunveruleikastjarnan Khloé Kardashian hefur sætt harðri gagnrýni undanfarið fyrir að breyta myndunum sínum. Netverjar hafa einnig gagnrýnt alla Kardashian-Jenner fjölskylduna fyrir að hafa tekið þátt í að setja svo óraunhæfa fegurðarstaðla fyrir konu rða þær eigi sjálfar erfitt með að fylgja þeim.
Það er því vert að rifja upp þegar kínverski áhrifavaldurinn @Coeyyyy steig fram fyrir ári síðan og sýndi hversu öflug þessi forrit geta verið.
Hún deildi nokkrum myndum og sýndi aðdáendum sínum hvernig hún lítur út ef hún breytir ekki myndunum sínum.
Hún sagðist hafa ákveðið að sýna fylgjendum sínum sitt raunverulega útlit eftir að hún var mynduð án hennar vitneskju.
„Ég hef ekki verið í besta skapinu eftir að ég var mynduð í laumi. En eftir að hafa skoðað valkosti mína þá ákvað ég að deila myndunum,“ sagði hún.
Það er mikill munur á myndunum og mætti segja að hún sé nær óþekkjanleg. Hún lét sig virðast vera grennri og breytti einnig andliti sínu áður en hún deildi myndum á samfélagsmiðlum.
Það er ekki ljóst hvaða forrit hún hefur notað en FaceTune er mjög vinsælt meðal áhrifavalda.
