Donna Cruz leikkona er nýjasti gestur Eddu Falak og Fjólu Sigurðardóttur í hlaðvarpsþættinum Eigin Konur. Þær ræða um fordóma og tala meðal annars um umdeilt „grín“ Péturs Jóhanns Sigfússonar í myndbandi sem Björn Bragi Arnarson deildi á Instagram fyrir ári síðan. Í myndbandinu er hann að leika asíska konu í kynlífsathöfnum og var hann í kjölfarið harðlega gagnrýndur og sakaður um rasisma og kvenfyrirlitningu.
Aðspurð hvort hún hafi fundið fyrir fordómum svarar Donna játandi. „Hvernig það er talað við mig stundum […] Ég var alveg í þeim pakka að gera rosa grín og vera með í gríninu en það fékk mig bara smá til að líða illa,“ segir hún og bætir við að þetta hafi verið hennar leið til að kljást við þetta.
Donna viðurkennir að þegar hún var yngri þá hefði hún örugglega verið með í gríninu hjá Pétri Jóhanni. „Ég hefði örugglega hlegið [að þessu] og fundist það ógeðslega fyndið. En þetta er samt ekki fyndið því þetta ýtir undir staðalímynd sem er að meiða fólk. Ég er ekki svona í dag. Ég hika ekki við að [segja eitthvað við fólk] ef mér finnst það fara yfir línuna,“ segir hún.
Þær ræða skaðsemi gríns hans og bendir Edda á skaðsemi þess þar sem oft sé komið öðruvísi fram við asískar konur í kynlífi. „Sem hefur ógeðsleg áhrif andlega á fólk,“ segir Edda.
Donna segir að hún hafi fengið slíkar athugasemdir. „Ég hef alveg fengið að heyra: „Já þú ert örugglega geggjuð í rúminu því þú ert svona asísk.“ Já þú ert örugglega heimskur,“ segir hún.
„Já eða þú ert ömurlegur í rúminu því þú ert úr Garðabænum, þetta meikar ekkert sens“ segir Edda.
Horfðu á viðtalið hér að neðan.