Texasbúinn Ayanna Williams sló sitt eigið heimsmet í heimsmetabók Guinness fyrir lengstu fingurneglurnar, skömmu áður en hún lét klippa þær í fyrsta skipti í tæpa þrjá áratugi. United Press International greinir frá þessu.
Ayanna sló fyrst heimsmet árið 2017 þegar fingurneglur hennar voru samanlagt 226,9 tommur eða rúmlega 5,7 metrar. Neglurnar voru aftur mældar áður en þær voru klipptar og reyndust þá 288,8 tommur eða rúmlega 7,3 metrar. Raunar er ekki rétt að segja að þær hafi verið klipptar því í raun þurfti að saga þær af.
Nöglunum var þó ekki hent heldur verða þær til sýnis á safninu Ripley´s Believe It or Not! í Flórída. „Ég get ekki beðið eftir að sjá þær þar,“ segir Ayanna og tekur fram að þetta séu söguminjar sem börnin hennar og barnabörnin geta notið. „Ég er mjög spennt yfir þessu,“ segir hún.
Í meðfylgjandi myndbandi er hægt að fylgjast með því þegar neglurnar hennar eru sagaðar af.