Lokaþáttur Einkalífsins á Vísi kom út fyrr í dag. Í þættinum svöruðu átta viðmælendur sömu spurningunni sem hljóðar svo: „Hvað er það vandræðalegasta sem þú hefur lent í?“
Tveir viðmælendur höfðu svipaða sögu að segja. Bæði Þórunn Erna Clausen söngkona og Patrekur Jaime raunveruleikastjarna hafa lent í því að pissa á sig.
„Sko ég held að það vandræðalegasta sem ég hef lent í er að pissa á mig á djamminu,“ segir Patrekur Jaime í þættinum.
„Það sem gerði það eiginlega vandræðalegra er að ég fór ekki heim. Ég kláraði að djamma áður en ég fór heim.“
Hann var í dökkum buxum þegar þetta skeði og það gerði honum kleift að fela slysið.
„Þetta var ógeð þegar ég hugsa út í það,“ segir hann. Aðspurður hvort hann hafi farið síðan pissublautur heim af djamminu svarar Patrekur játandi.
„Kærasti vinkonu minnar skutlaði mér heim og ég fór úr nærbuxunum, því þær voru pissublautar, og ég skildi þær eftir í bílnum og hann sá það svona þremur dögum seinna. Þetta var bæði vandræðalegt og ógeðslegt,“ segir hann við hlátrasköll.
Þórunn Erna var ekki á djamminu eins og Patrekur, heldur var hún ólétt og kærasti hennar gerði henni grikk með því að bregða henni svo illa að hún missti þvag. Hún ætlaði að hlaupa í burtu í skömm en rann í bleytunni og datt.
Horfðu á þáttinn í spilaranum hér að neðan.