Stjörnukokkurinn Ebba Guðný Guðmundsdóttir er nýjasti gestur Einkalífsins á Vísi. Í þættinum opnar hún sig um vinskap síns og suðurafríska spretthlauparans Oscar Pistorius.
Oscar er með sama fæðingargalla og eiginmaður Ebbu Guðnýjar, Hafþór Hafliðason, sem fæddist án fótleggja. Þannig kynntust hjónin spretthlauparanum og úr varð góður vinskapur. Það var því mikið áfall fyrir fjölskylduna þegar Oscar var dæmdur fyrir að myrða kærustu sína.
Oscar var fyrst dæmdur í sex ára fangelsi fyrir manndráp af gáleysi í Suður-Afríku. Hann skaut kærustu sína, Reevu Steenkamp, fjórum sinnum í gegnum hurð á heimili þeirra á Valentínusardaginn árið 2013. Ári seinna dæmdi áfrýjunardómstóll hann í þrettán ára fangelsi og breytti dómnum í morðdóm.
Oscar hefur alltaf haldið fram sakleysi sínu og sagt að hann hafði haldið að hún væri innbrotsþjófur. „Ég hef alltaf trúað honum, algjörlega,“ segir Ebba Guðný.
Ebba Guðný var viðstödd réttarhöldin og segir fjölskylduna heimsækja hann í fangelsið á hverju ári.
„Það var mikið áfall fyrir okkur sem fjölskyldu að fá þessar fréttir á sínum tíma,“ segir hún í þættinum.
Ebba Guðný segir að bornar hafi verið á hann lygar í fjölmiðlum. „Það voru til dæmis fyrirsagnir í blöðum að hann hafi barið hana í höfuðið og mölbrotið höfuðkúpuna hennar með svona krikketkylfu sem er bara bull, og það var mynd af blóði og kylfu. Þetta var aldrei leiðrétt og það var endalaust svona,“ segir hún.
Hún ræðir málið nánar í þættinum sem má horfa á hér að neðan.