fbpx
Laugardagur 10.apríl 2021
Fókus

„Umdeildasti þjálfari landsins“ segir það sem hann hefur aldrei þorað að segja

Guðrún Ósk Guðjónsdóttir
Þriðjudaginn 2. mars 2021 10:46

Brynjar Karl. Mynd/YouTube

Ekki missa af Helstu tíðindum dagsins í pósthólfið þitt

Lesa nánar

Körfuknattleiksþjálfarinn Brynjar Karl Sigurðsson er nýjasti gesturinn í Podcasti Sölva Tryggvasonar. Hann hefur undanfarin ár þjálfað ungar stúlkur í körfubolta, sem spila nú með íþróttafélaginu Aþenu. Kvikmyndin „Hækkum Rána“ sem nýverið kom út og fjallar um ferðalag Brynjars og stúlknanna hefur vakið gífurlegt umtal í samfélaginu. Brynjar er gjarnan kallaður umdeildasti þjálfari landsins. Í þættinum fer hann yfir söguna alla og gagnrýnina sem hann hefur fengið.

„Ég gef mig út fyrir að vera einkar fær í að hjálpa kvíðabörnum. Ég er rosalegt kvíðabarn sjálfur. Ég er mjög orkumikill og þegar mitt „sympatíska“ kerfi fer á hliðina og ég fer að hafa áhyggjur þá verður bara eldgos. Þegar ég sé hvað er búið að gerast hjá þessum stelpum á meðan þetta verkefni hefur verið í gangi finn ég að þetta má ekki hætta,“ segir Brynjar, sem segir að allir sem að verkefninu koma vilji láta gott af sér leiða.

Enginn fær borgað

„Hjá okkur í Aþenu fær enginn borgað fyrir að þjálfa, hvorki ég né aðrir. Það er enginn í þessu fyrir peninginn. Mér finnst gott að ég sé ekki að fá borgað, þó ekki nema bara til að ég sé smá fyrirmynd þar. Þegar ég var að þjálfa FSU setti ég milljónir í liðið sjálfur úr eigin vasa og ég er líka að borga með mér í þessu núna í Aþenu. Ég vil láta gott af mér leiða og og hafa góð áhrif og þetta er það sem ég kann best. Að þjálfa. Á öllum mínum 32 ára ferli sem þjálfari hef ég aldrei verið jafnstoltur af neinu liði sem ég hef þjálfað. Fólk verður aðeins að fara að kúpla sig inn á það hversu magnaðar þessar gellur eru. Þær eru algjörlega magnaðar og ég veit ekki hvað ég þarf að gera til að þjálfa aftur svona lið. Þetta var ótrúlegt lið,” segir Brynjar og getur ekki haldið aftur af tárunum þegar hann talar um stelpurnar.

„Þessar stelpur eru svo miklar fyrirmynd og það eiginlega bara breytti heilastarfseminni hjá fólki að mæta á æfingar. Það er svo rosalega uppörvandi að horfa á þetta. En svo var hópnum tvístrað eftir að þær létu medalíurnar falla. Ég man að ég hugsaði þá að minn tími væri bara kominn og ég yrði að hætta og vonandi myndi eitthvað gott sitja eftir hjá þessum stelpum. Svo kemur dóttir mín til mín og segir: „Pabbi, flytjum bara til útlanda“ og ég hugsaði með mér að það væri bara góð hugmynd, en mér fannst samt ömurlegt að það væri verið að gengisfella það sem þessar stelpur væru búnar að gera. Þú verður að átta þig á því að þetta er toppurinn á mínum þjálfaraferli. Ég mun aldrei toppa það sem gerðist þegar þær létu medalíurnar falla. Þetta var fullkomið. Ég var búin að hugsa frá byrjun að ég vildi að þessar stelpur tækju pláss, létu í sér heyra, væru óhræddar við að gera mistök og settu sinn eigin standard. Svo ákveða þær þetta sjálfar, æfa þetta og gera þetta svo. Pældu í hvað þú þarft mikið af vitund til að vera 13 ára og fá þessa hugmynd og framkvæma hana. En svo átti bara að moka þessu undir teppið og ofan í skúffu og hvorki KKÍ né íþróttafélögin ætluðu að tala um þetta við stelpurnar. Á einhverjum punkti hugsaði ég að ég ætlaði aldrei að vera gæinn sem væri búinn að standa á bak við þær allan þennan tíma og svo myndi ég bara hætta. Ég fann að ég yrði að halda þessu áfram og þetta mætti ekki deyja.”

Hann segir atvikið þegar stelpurnar létu medalíurnar falla vera magnað og sér finnist það furðulegt að fólk hafi bara talað yfir þær og framhjá þeim eins og þær væru heilalaus vélmenni:

„Ég var búinn að ræða mikið við stelpurnar um það hvort og hvernig þær vildu mótmæla og gerði þeim grein fyrir því að þeir sem tækju slaginn og stæðu í lappirnar fengju sjaldnast viðurkenninguna fyrir það, eins og sagan sýnir okkur aftur og aftur. Hausinn á þeim fór á fullt og það sem gerðist er bara magnað.“

Aldrei þorað að segja þetta

Brynjar á langan feril sem þjálfari, en hrífst ekki af þeirri menningu sem er við lýði hjá mörgum félögum.

„Ég hef aldrei þorað að segja þetta, en mér var boðið starf í þjálfarateyminu hjá Memphis Grizzlies í NBA deildinni. Það var „character defining“ augnablik hjá mér að segja nei við þessu. Ég hef bara ekki áhuga á því að vera innan um alla þessa peninga af því að þá er þetta allt orðið svo skakkt. Þessi stóru íþróttafélög eru oft bara orðin „porn-klúbbar“ þar sem er verið að klæmast á gildum íþróttanna. Það er ekkert rými fyrir að fá að skora sig á hólm og prófa nýja hluti þó að það komi ekkert út úr því. Mér hefur aldrei verið boðið starf í efstu deild á Íslandi, þó að ég hafi komið menntaskólaliði FSU upp í úrvalsdeild þegar ég var upp úr þrítugu. Það varð yngsta félagið í sögunni og með yngsta leikmannahópinn til að spila í úrvalsdeild í boltagrein á Íslandi,“ segir hann og heldur áfram.

„Mér fannst eiginlega fyndið að ég hafi ekki fengið nein símtöl með starfstilboðum eftir það. En kannski er það bara það að menn skynja það mjög sterkt að ég hafi ekki áhuga á þeim kúltur sem er í gangi og þess vegna vilja þeir ekki snerta á mér með priki. Höldum okkur við þá skýringu.”

Í þættinum ræða Sölvi og Brynjar um allt ferlið í kringum kvikmyndina og þjálfunina, feril Brynjars og aðferðir hans og margt margt fleira.

Þáttinn í heild má sjá hér að neðan. Það má einnig hlusta á hann á Spotify.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Fókus
Fyrir 2 dögum

„Þegar Bjarni Dagur segir að það sé ódýrt, þá er það ódýrt“

„Þegar Bjarni Dagur segir að það sé ódýrt, þá er það ódýrt“
Fókus
Fyrir 2 dögum

Sævar Þór opnar sig upp á gátt – Varð fyrir kynferðisofbeldi aðeins 8 ára gamall – „Það er upphafið á að ég glata minni barnæsku“

Sævar Þór opnar sig upp á gátt – Varð fyrir kynferðisofbeldi aðeins 8 ára gamall – „Það er upphafið á að ég glata minni barnæsku“