Ronda Felton er nítján ára gömul og keppandi í American Idol. Hún opnar sig um erfiða æsku og segir frá því hvernig hún og móðir hennar áttu um sárt að binda á þeim tíma. En í gegnum allt saman hefur móðir hennar staðið þétt við bakið á henni og er áheyrnarprufan engin undantekning. Á meðan Ronda gengur inn í herbergið með dómurunum bíður móðir hennar spennt og stressuð frammi.

Ronda söng lagið „One Night Only“ úr kvikmyndinni Dreamgirls. Það er óhætt að segja að hún hafi gjörsamlega neglt áheyrnarprufuna og felldi Lionel Richie nokkur tár.

„Ég var bara nokkuð góður þar til þú komst hingað inn og gerðir eitthvað sem enginn hefur gert áður. Sem er að hafa slík áhrif á mig að ég græt,“ sagði Lionel Richie. Hann gefur henni einnig hughreystandi ráð og hvetur hana áfram.

„Þetta er augnablikið sem mun breyta lífi þínu,“ segir hann.

Ronda fékk já frá öllum dómurum og heldur áfram í næstu umferð. Móðir hennar fékk að koma inn í herbergið og heyra það frá dómurunum að dóttir hennar hafi komist áfram. Mæðgurnar sungu fyrir dómarana og brast Lionel í söng með þeim.

Horfðu á áheyrnarprufuna hér að neðan.