Hljómsveitin vinsæla Daft Punk er hætt. Tvíeykið greindi frá endalokum hljómsveitarinnar með myndbandi á YouTube-síðu sinni í dag og hafa fréttirnar verið staðfestar af talsmönnum þeirra.
Daft Punk hefur lengi verið ein vinsælasta hljómsveit síðustu ára en verk þeirra hafa mótað tónlistarheiminn gríðarlega. Það er nánast hægt að fullyrða að allir þekki að minnsta kosti eitt lag sem hljómsveitin flytur eða þá hefur samið. Lög þeirra hafa ómað í útvörpum og hafa staðið sína vakt á vinsældarlistum úti um allan heim.
Vinsælustu lög þeirra eru til dæmis Get Lucky, One More Time, Around the World, Lose Yourself to Dance og Harder, Better, Faster, Stronger. Meðlimir hljómsveitarinnar, þeir Thomas Bangalter og Guy-Manuel de Homem-Christo, eru, þrátt fyrir vinsældir hljómsveitarinnar, ekki jafn þekktir meðal almennings og hljómsveitin sjálf. Ástæðan fyrir því er sú að þeir hafa frá upphafi komið fram með hjálma sem hylja andlit þeirra.
Ljóst er að fréttirnar koma aðdáendum hljómsveitarinnar í uppnám. Plötusnúðurinn Atli Viðar Þorsteinsson er á meðal þeirra sem tjá sig um endalokin en hann gerir það á samfélagsmiðlinum Twitter.
Er eðlilegt að vera 37 ára gamall með tárin í augunum af því að hljómsveit var að hætta?
Er ekki að spyrja fyrir vin. pic.twitter.com/9w7r9OWJtk— Atli Viðar (@atli_vidar) February 22, 2021
Hér fyrir neðan má sjá myndbandið þar sem endalok hljómsveitarinnar eru tilkynnt: