Snorri Barón Jónsson umboðsmaður vekur athygli á raunveruleika margra íþróttakvenna í færslu á Instagram. Þar greinir hann frá því að ríkur karlmaður hafi haft samband við hann og óskað eftir því að vera „sykurpabbi“ íþróttakonu sem er skjólstæðingur Snorra. Vísir greindi fyrst frá.
Snorri er umboðsmaður tveggja af okkar skærustu CrossFit-stjarna, Söru Sigmundsdóttur og Björgvins Karls Guðmundssonar. Snorri nefnir þó ekki skjólstæðinginn á nafn í færslunni, en segir að þetta sé kvenmaður í einstaklingsíþrótt sem er tiltölulega ný.
Maðurinn sagðist vera reiðubúinn að borga skjólstæðingi Snorra rúmlega sex milljónir króna fyrir helgi eða þrettán milljónir króna fyrir fimm daga. Hann myndi sjá um að borga allan ferðakostnað, til og frá annað hvort New York eða Los Angeles.
„Þetta yrði eins og sykurpabba/stelpu samkomulag. Gæti verið á mánaðarfresti,“ segir maðurinn í tölvupósti sínum til Snorra.
Maðurinn sagðist hafa séð konuna á Instagram og þótt hún glæsileg. „Ég er 44 ára, einfaldur og rólegur. Mjög vel settur. Gæti verið leið til að þéna vel og þetta telst varla vera vinna.“
View this post on Instagram
Snorri segir að til að byrja með hafi hann og skjólstæðingur hans hlegið að tilboðinu. „En þegar ég sast niður og fór að hugsa meira um þetta, þá fauk í mig,“ segir hann.
„Þetta er ekki í fyrsta skipti sem ég sé svona skilaboð, en þessi höfðu öðruvísi áhrif. Kannski því þetta er maður á sama aldri og ég, en aðallega vegna þess að þetta er frá einhverjum sem er ríkur og heldur að það gefi honum rétt á að gefa skít í alla vinnuna og fórnirnar sem þessar stelpur hafa gert og ætlast til að þær sjái þetta sem „win/win“ samkomulag,“ segir hann.
Snorri segir að þetta geri hann alveg vitlausan en þetta muni ekki breytast nema við gerum eitthvað í málinu. „Er ekki kominn tími til að byrja á því að opinbera þessa andskota?“