Poppkóngur Íslands Páll Óskar Hjálmtýsson opnar sig um samfélagsmiðla og neikvæð áhrif þeirra í viðtali við RÚV.
Páll Óskar segir að hann verður reglulega vitni að rifrildum netverja og missi í kjölfarið trúna á mannkyninu. Hann nefnir einnig áhrifin sem samfélagsmiðlar hafa á krakka og unglinga.
„Þeim líður ekki vel á Instagram þar sem allir eru með stór brjóst og fullkominn rass og kröfurnar eru orðnar gígantískar,“ segir hann við RÚV.
Páll Óskar notar sjálfur samfélagsmiðla en aðeins í atvinnutilgangi. Hann deilir ekki fréttum úr einkalífinu né engu öðru sem tengist daglegu lífi hans. Páll Óskar segir að það komi ekki neinum við hvað hann borðar og hann hefur þá reglu að deila aldrei mynd af heimili sínu.
„Ég vel að taka ekki myndir af sjálfum mér heima hjá mér ótt og títt. Ég vil bera virðingu fyrir mínu prívat lífi og ég verð að bera virðingu fyrir heimilinu mínu. Ég vil ekki að hver sem er viti hvernig heimilið mitt lítur út því heimilið mitt er hreiður þar sem ég verð að fá hvíld,“ segir hann.
En þegar hann deilir einhverju á samfélagsmiðlum fær hann „likes“ á heilann. „Ég er orðinn læksjúkur og dagurinn fer í þetta. Hann eyðileggst hjá mér,“ segir hann.
Hann segist óska þess að geta hætt þessu öllu saman en neyðist til að nota samfélagsmiðla til að auglýsa tónleika og verkefni.
