Helgi Björnsson lætur ekki slá sig útaf laginu og verður með streymistónleika í gegnum helstu streymisveitur landsins í kvöld frá Hótel Borg. Það má segja að þetta sé einskonar viðhafnar útgáfa af kvöldtónleikunum hans og Reiðmannanna til þessa því í kvöld eru þeir í höll en ekki í hlöðu. En streymt verður frá Hótel Borg í kvöld og gestalistanum er haldið leyndum.
Ákvörðunin um að hafa þetta streymistónleika en ekki hefðbundinn sjónvarpsþátt var tekin í vor en eftir nýlegar breytingar á samkomutakmörkunum virðist hann nú vera einn af fáum tónlistarmönnum sem mun ná að koma fram eins og til stóð.
„Hugmyndin var upphaflega að bjóða þeim sem almennt eru ekki að sækja tónlistarhátíðir um verslunarmannahelgar kost á að kaupa til sín tónlistarflutning ef svo má segja. Þetta verður einlægt og skemmtilegt, svona í þeim anda sem við erum þekkt fyrir. Við ætlum að eiga saman gæðastund og bjóða upp á vandaða tónlistardagskrá í takt við það sem við höfum verið að gera en við stráum fallegum sumartónum yfir þetta,” segir Helgi.
Þannig verður kvöldskemmtun Helga og Reiðmannanna aðgengileg öllum, hvar sem þeir eru í heiminum. Streymið hefst klukkan 21:00 og hægt að tryggja sér aðgengi í gegnum Símann, Vodafone og Tix.is