Það vakti mikla athygli í síðustu viku þegar Kardashian-fjölskyldan reyndi að fjarlægja mynd af Khloé Kardashian af netinu.
Amma Khloé, MJ, deildi óvart mynd af Khloé á Instagram. Myndinni hafði ekkert verið breytt í myndvinnsluforritum og fór á flug á samfélagsmiðlum. Myndin fór á enn meira flug eftir að það kom í ljós hversu mikið Kardashian-fjölskyldan var tilbúin að leggja á sig til að fjarlægja myndina.
Khloé endaði með að tjá sig um málið. Hún sagði að útlitsfordómarnir sem hún hefur fundið fyrir í gegnum árin séu miklir.
Sjá einnig: Khloé tjáir sig um myndina sem Kardashian-fjölskyldan vildi ekki að þú myndir sjá
Fjöldi netverja bentu á að Kardashian fjölskyldan hafi tekið þátt í að setja svo óraunhæfa fegurðarstaðla fyrir konur að þær eigi sjálfar erfitt með að fylgja þeim.
Þetta er ekki í fyrsta skipti sem Khloé Kardashian hefur verið á milli tannanna á fólki fyrir að breyta myndum eða útliti sínu. Andlit hennar hefur breyst töluvert í gegnum árin.
Ýmsar kenningar eru á sveimi, eins og að hún hafi gengist undir fjölda fegrunaraðgerða og noti myndvinnsluforrit áður en hún deilir myndum á samfélagsmiðlum.
Eitt er þó víst, margt hefur breyst síðan fyrsta þáttaröð Keeping Up With The Kardashians fór í loftið fyrir fjórtán árum síðan. En það á þó líklega við um okkur flest, enda fjórtán ár mjög langur tími. Heilt fermingabarn getur fæðst og fermst á fjórtán árum, ja í það minnsta fermingabarn sem fæddist ekki fjórtán árum fyrir COVID.
Þegar Keeping Up With The Kardashians fór í loftið var Khloé óþekkt 22 ára kona. Hún hefur viðurkennt að á þessum tíma hafi hún verið mjög óörugg, þar sem fjölmiðlar og áhorfendur voru sífellt að bera hana saman við eldri systur sínar, Kim og Kourtney Kardashian.
„Ég áttaði mig ekki á því að ég væri „feita systirin“ fyrr en ég var í sjónvarpinu og fjölmiðlar fóru að segja það um mig,“ sagði hún.
Ári seinna var Khloé byrjuð að breyta útliti sínu minniháttar, eins og að hvítta tennurnar og vera með gervibrúnku.
Khloé var þarna byrjuð að skera sig aðeins úr systrahópnum með því að lita hárið ljósara. Margir telja líklegt að þarna hafi hún verið byrjuð að gangast undir ýmis konar fegrunaraðgerðir.
Kardashian-Jenner systurnar hafa lengi verið sakaðar um að breyta samfélagsmiðlamyndum sínum áður en þær deila þeim, en af þeim öllum hefur Khloé örugglega sætt hvað harðastri gagnrýni.
Sérstaklega síðastliðið ár, það vakti mikla athygli þegar hún deildi mynd af sér á Instagram og töldu netverjar hana vera nær óþekkjanlega. Stuttu seinna kom raunverulega myndin í ljós og sannaði að myndinni hafi verið breytt umtalsvert.
Útlit Khloé virðist vera síbreytilegt og er nokkuð öruggt að hún sé að notast við einhvers konar myndvinnsluforrit.
Fjölmargir telja gagnrýnina vera réttmæta, þar sem þetta getur verið blekkjandi fyrir ungar konur að sjá á samfélagsmiðlum og halda að þetta sé raunhæft útlit til að stefna að. En aðrir benda á að það þarf einnig að taka inn í myndina að útlitspressan á Khloé hefur verið gífurleg undanfarin fjórtán ár. Hún er stöðugt gagnrýnd fyrir útlit sitt og borin saman við systur sínar.