Kristjón Kormákur Guðjónsson, fyrrverandi ritstjóri DV, Hringbrautar og Fréttablaðsins, birti Facebook-færslu í dag þar sem hann veltir fyrir sér bréfsendingu sem kom á ritstjórnarskrifstofu DV í ágúst 2017. Færsla Kristjóns ber yfirskriftina „UNDARLEG 3 ÁRA ÓLEYST GÁTA“
„Það var nokkuð undarlegt bréfið sem barst inn á ritstjórnarskrifstofu DV þann 10. ágúst 2017. Á þeim árum sem ég starfaði sem ritstjóri barst nokkur fjöldi af furðulegum en skemmtilegum sendingum.“
Í brúnu umslagi segist Kristjón hafa fengið 59 útprentaðar myndir af leikaranum Pierce Brosnan, Pokémon-persónunum Ash og Pikachu og svo Donald Trump. Hann segir að enn þann dag í dag viti hann ekki hver hafi sent myndirnar, og þá spyr hann hver skilaboðin hafi verið.
„Þessi gáta er óleyst nú þremur árum síðar en ekki er vitað hver sendandinn var. Við sem störfuðum á ritstjórn DV á þessum tíma náðum að mig minnir aldrei að átta okkur á þessari:
„Í brúnu umslagi voru:
31 útprent í afar góðum gæðum af leikaranum Pierce Brosnan
19 útprent Ash og Pikachu
Og síðan voru 9 stykki af Donald Trump.
Hver eru skilaboðin?“
Þessi gáta Kristjóns virðist nokkuð snúin og erfitt er að finna tengingar á milli myndanna. Donald Trump var vissulega forseti árið 2017 og tölvuleikurinn Pokémon Go naut mikilla vinsælda um sama tíma. Þó virðist Pierce Brosnan ekki hafa verið að gera neitt sérstakt á þessum tímapunkti. Þá er hægt að benda á að bæði 19 og 31 eru prímtölur, en það er 9 því miður ekki.
