Elísabet Sveinsdóttir greindist með brjóstakrabbamein í lok árs 2012. Í kjölfarið fór hún í brjóstnám og lyfjameðferð sem fór illa í hana. Meðferðarúrræðið „Treystu mér“ varð að veruleika eftir að Elísabet fór á hestbak eftir aðgerðina. Elísabet er í forsíðuviðtali hjá Fréttablaðinu í dag. Hún er hestakona, kennari og knattspyrnuþjálfari á Selfossi.
Elísabet er laus við krabbann í dag. Þegar hún fór í fyrsta skipti á hestbak eftir aðgerðina fékk hún hugmyndina að því hvernig hún gæti nýtt bæði þekkingu sína og þá jákvæðu strauma sem hún fær frá hrossunum, til að hjálpa öðrum. „Ég á hunda, kött og hesta og það heldur manni gangandi á vissan hátt að þurfa að fara út með hundinn og sinna hrossunum. Það hefur bara í rauninni haldið í mér lífinu. Það er bara algjörlega þannig,“ segir Elísabet í samtalið við Fréttablaðið.
Elísabet er með meðferðarúrræði sem kallast „Treystu mér“. Er það hugsað fyrir börn sem eiga við andlega erfiðleika eða frávik. Byggir hún meðferðarúrræðið meðal annars á eigin reynslu og erlendum rannsóknum sem sýna fram á að umgengni við dýr opni á fleiri og aðra möguleika til að nálgast börn sem eiga í andlegum erfiðleikum.
Meðferðin felur í sér samneyti við hesta og umgengni við þá, þar sem Elísabet vinnur með eitt barn í einu og hrossið er umgengist á forsendum þess. Börnin umgangast hestinn og hundana bæði inni í hesthúsinu sem og úti í gerði. Allt samneyti barnsins við hestinn fer fram undir eftirliti og leiðsögn Elísabetar. Fyllsta öryggis er gætt og eru helstu öryggisatriði og búnaður fyrir hendi.
